Shkodra ''mbetet'' blu, dilema e qytetarëve: A do të ketë investime?

E vetmja bashki në vend me kryetare nga partia Demokratike, Shkodra, edhe në zgjedhjet e 25 prillit tregoi se mbetet një bastion i padiskutueshëm i opozitës.

Të pakënaqur me investimet e kryera në këto 8 vite të qeverisjes së socialistëve, shkodranët janë të dyzuar nëse në mandatin e tretë Shkodra do të marrë vëmendjen e duhur për investime apo do të vazhdojë të trajtohet në të njëjtën mënyrë, aty ku kryeministri akuzon kryetaren e bashkisë se nuk bashkëpunon dhe nga ana tjetër kryebashkiakja akuzon qeverinë se e ka lënë në “baltë” Shkodrën.

Por duket se në një pikë shkodranët janë të gjithë në një mendje, kur i pyet nëse është investuar në Shkodër në këto 8 vite të socialistëve.

“Shkodra u provua që është demokratike, ka 8 vite që askush nuk ka ndërhyrë në Shkodër. Edhe uji kur nuk lëviz për 4 vjet, merr erë”, thonë banorët.

Ndoshta ky është mandati ku sfida e qeverisë socialiste është që të bindë edhe veriun se është qeveri e të gjithë shqiptarëve. (A2 Televizion)