Iraku po përballet me një krizë të rëndë të eksporteve të naftës për shkak të bllokimit të vazhdueshëm të Ngushticës së Hormuzit, duke e detyruar Bagdadin të kërkojë rrugë alternative për të siguruar të ardhurat jetike për ekonominë e vendit.
Rreth 90 për qind e eksporteve të naftës së Irakut kalojnë përmes Gjirit, ndërsa të ardhurat nga nafta përbëjnë rreth 90 për qind të buxhetit federal. Për shkak të krizës, vendi raportohet të ketë humbur rreth 60 miliardë dollarë të ardhura nga nafta që nga fillimi i luftës.
Sipas të dhënave të paraqitura nga Organizata Irakiane e Tregtimit të Naftës (SOMO), kapaciteti i eksportit në shtator ishte rreth 4.2 milionë fuçi në ditë, ndërsa eksportet aktuale kanë zbritur në rreth 2.5 milionë fuçi në ditë. Para krizës, Iraku eksportonte rreth 3.5 milionë fuçi në ditë.
Për të tërhequr blerës, SOMO ka ofruar zbritje të konsiderueshme për naftën irakiane, por konkurrenca në treg është rritur edhe më tej pasi vende të tjera të Gjirit kanë ofruar ulje çmimesh.
Qeveria irakiane po shqyrton alternativa për eksportin, veçanërisht përmes Turqisë. Një pjesë e naftës po transportohet nga fushat jugore drejt veriut dhe më pas eksportohet përmes Naftësjellësit Irak-Turqi drejt portit mesdhetar të Ceyhanit.
Iraku dhe Turqia kanë nënshkruar gjithashtu një marrëveshje njëvjeçare, me mundësi zgjatjeje, për të synuar eksportin e të paktën 750 mijë fuçive naftë në ditë përmes këtij korridori.
Bagdadi po shqyrton edhe mundësinë e krijimit ose zgjerimit të rrugëve të eksportit përmes Jordanisë dhe Sirisë. Megjithatë, ekspertët paralajmërojnë se këto alternativa nuk mund të zëvendësojnë shpejt kapacitetin e humbur përmes Gjirit.
Analistët e industrisë së naftës theksojnë se, në kushtet aktuale, Ngushtica e Hormuzit mbetet rruga kryesore për eksportimin e sasive të mëdha të naftës irakiane. Për këtë arsye, çdo zgjatje e konfliktit dhe pasiguria në ngushticë mund të ushtrojë presion të mëtejshëm mbi financat publike të Irakut. (A2 Televizion)
A2 CNN Livestream
MUND TE LEXONI GJITHASHTU
