Lufta e Izraelit në Liban ka marrë një tjetër dimension. Tashmë IDF ka sulmuar edhe ushtarë libanezë. Mediat ndërkombëtare raportojnë se trupat izraelite vranë tre ushtarë libanezë në Libanin jugor.
Sulmi vjen në momentin kur Franca ka zhvilluar një konferencë për të rritur mbështetjen për forcat shtetërore libaneze, të cilat shihen si jetike për çdo zgjidhje diplomatike të luftës midis Izraelit dhe Hezbollahut. Ushtarët libanezë u vranë, ndërsa po evakuonin të plagosurit në periferi të fshatit jugor Yater, tha ushtria libaneze.
Ata u vranë rreth orës 4:15 të mëngjesit të së enjtes, tha një burim i sigurisë për Agjencinë e Lajmeve Reuters.
E armatosur dhe e trajnuar nga Shtetet e Bashkuara, ushtria libaneze ka pak ndikim në terren në bastionet e Hezbollahut në Libanin jugor. Ajo rekruton nga të gjithë komunitetet e panumërta sektare të Libanit dhe është parë si një garantues i paqes që nga lufta civile e viteve 1975-1990.
Vendosja e tij në jug është një pjesë kyçe e rezolutës 1701 të Këshillit të Sigurimit të OKB-së, e cila i dha fund një lufte të vitit 2006 midis Hezbollahut dhe Izraelit.
Sakaq, Presidenti Francës, Emmanuel Macron nga Parisi ka kërkur që Izraeli të ndalë sulmet mi Liban: “Lufta duhet të përfundojë sa më shpejt që të jetë e mundur. Duhet të ketë një armëpushim në Liban. Më shumë dëme, më shumë viktima, më shumë sulme nuk do t'i japin fund terrorizmit dhe as nuk do të garantojnë sigurinë e të gjithëve. Më vjen keq që Irani është i përfshirë në këtë, ndërsa interesi më i madh i Libanit kërkon që ai të qëndrojë larg luftës në Gaza, më vjen keq që Izraeli vazhdon operacionet e tij ushtarake në Liban, në jug, në Bejrut dhe gjetkë, dhe se numri i viktimave civile vazhdon të rritet”.
Takimi i cili po mbahet në Paris ku merr pjesë edhe kryeministri i Libanit, kanë si qëllim ofrimin e ndihmës urgjente humanitare për Libanin, mbështetjes për forcat e tij të sigurisë dhe shtytjes për një armëpushim.
Liderët e mbledhur në Paris thanë se me rolin e fuqishëm të SHBA-së në këtë rajon, arritja e një paqe të shpejtë duket e largët. Franca ka lidhje historike me Libanin dhe ka punuar me Uashingtonin në përpjekje për të siguruar një armëpushim. (A2 Televizion)
A2 CNN Livestream
MUND TE LEXONI GJITHASHTU
