Ministri i Migracionit në Suedi, Johan Forssell deklaroi se nuk do të japë dorëheqje, pas raportimeve se djali i tij 16-vjeçar ka qenë i përfshirë në grupe ekstremiste të djathta, përfshirë edhe organizatën neo-naziste Nordic Resistance Movement.
Lajmi u bë publik nga organizata suedeze kundër racizmit, Expo, e cila identifikoi një “të afërm të ngushtë” të një ministri si person aktiv në të djathtën ekstreme, i cili më pas u konfirmua nga vetë Forssell si djali i tij.
Forssell tha për televizionin TV4 se nuk kishte dijeni për veprimtarinë e të birit deri kur u kontaktua nga Shërbimi i Sigurisë Suedeze disa javë më parë.
Ai theksoi se kishte ndjekur të gjitha procedurat e duhura dhe vendosi të mos e bënte çështjen publike për të mbrojtur privatësinë e një të mituri.
“Ndoshta shumë prindër mund të lidhen me faktin se nuk e dinë plotësisht çfarë bëjnë fëmijët e tyre në rrjetet sociale,” tha ai.
Sipas Expo, djali i Forssell ka bashkëpunuar me një anëtar të NMR dhe ka qenë i përfshirë në dy grupe të tjera ekstremiste, duke rekrutuar të rinj për njërin prej tyre.
Eksperti i sigurisë Magnus Ranstorp paralajmëroi se grupet ekstremiste janë bërë më të sofistikuara në rekrutimin e të rinjve, duke përdorur rrjetet sociale dhe madje edhe pamjen fizike si mjet tërheqjeje.
Forssell theksoi se djali i tij është penduar dhe ka ndërprerë çdo kontakt me grupet. Kryeministri Ulf Kristersson konfirmoi besimin e tij ndaj ministrit, duke e quajtur reagimin e tij si “të përgjegjshëm”.
Megjithatë, opozita e majtë ka premtuar ta thërrasë Forssell në parlament për të dhënë shpjegime në vjeshtë, duke akuzuar qeverinë për standarde të dyfishta ndaj ekstremizmit. (A2 Televizion)
A2 CNN Livestream
MUND TE LEXONI GJITHASHTU
