Protesta e studentëve para Ministrisë së Arsimit është përshkallëzuar ndjeshëm, pasi disa të rinj kanë shkulur kangjellat dhe pllakat e rrugës dhe kanë thyer xhamat e dritareve të godinës, raporton A2 CNN. Nuk kanë munguar as gjuajtjet me vezë dhe bojë. Sisa prej tyre kanë tentuar edhe të shkatërrojnë derën e godinës së ministrisë.
Prej orës 14:00 të së martës, disa qindra studentë u mblodhën para godinës së Ministrisë së Arsimit, duke bllokuar qarkullimin në Rrugën e Durrësit.
Në një deklaratë të publikuar para nisjes së tubimit, studentët thanë se kërkojnë largimin e klasës politike 35-vjeçare, pasi, sipas tyre, nuk ka bërë asnjë hap konkret për studentët dhe arsimin.
Ata kërkojnë përmirësimin e kushteve në fakultete dhe konvikte, si dhe ndryshime në drejtimin e vendit. Protestës u janë bashkuar edhe qytetarë të grupmoshave të ndryshme, në mbështetje të kërkesave të tyre.
Krahas kërkesave për përmirësimin e infrastrukturës dhe të kushteve të jetesës, protestuesit kanë kërkuar edhe dorëheqjen e ministres së Arsimit dhe të kryeministrit Edi Rama. Gjatë protestës janë dëgjuar thirrje kundër Ministrisë së Arsimit, të cilën protestuesit e kanë cilësuar si “ministria e turpit”.
Sipas organizatorëve, tubimi synon të shprehë pakënaqësinë për çështjet që, sipas tyre, vijojnë të mbeten të pazgjidhura dhe për mungesën e reagimit nga institucionet. Përmes thirrjeve në rrjetet sociale, ata u kanë bërë apel studentëve nga qytete të ndryshme të vendit, si dhe qytetarëve, që t’i bashkohen protestës.
Megjithatë, deri në këto momente, studentët nuk kanë paraqitur një listë të detajuar me kërkesa konkrete për ndryshimet që presin në politikat arsimore. Pjesa më e madhe e protestuesve të identifikuar janë studentë të fakulteteve të Universitetit të Tiranës dhe të Universitetit Politeknik. (A2 Televizion)
A2 CNN Livestream
MUND TE LEXONI GJITHASHTU
