Në samitin e diktatorëve në Kinë ka vend edhe për presidentin e Serbisë. Madje Aleksandër Vuçiç do të takojë dhe disa prej tyre, përfshirë liderin e Rusisë, Vladimir Putin.
Këtë e konfirmoi Juri Ushakov, ndihmësi i shefit të Kremlinit, sipas një lajmi që raportohet nga media e Moskës, Ria Novosti.
“Sigurisht, do të diskutohet edhe situata në Kosovë, si dhe në lidhje me Republikën Srpska”, zbuloi Ushakov. Ndihmësi i Putinit shtoi më tej se mes temave do të jetë dhe thellimi i bashkëpunimit ruso-serb, me fokus të veçantë në sektorin e energjisë.
Zyrtarë të ndryshëm të Moskës, përfshirë presidentin Putin, e kanë përdorur vazhdimisht rastin e Kosovës për të justifikuar luftën e nisur kundër Ukrainës. Madje shefi i Kremlinit e arsyetoi njohjen e republikës së vetëshpallur të Donbasit me veprimet që sipas tij ka bërë perëndimi me njohjen e Kosovës, duke pranuar për herë të parë vlefshmërinë e vendimit të Gjykatës Penale Ndërkombëtare për atë rast.
Ndërkohë, gjatë qëndrimit në Kinë, presidenti serb do të takohet edhe me liderin Xi Jinping, që e ka organizuar këtë samit për të shënuar një pikënisje të një rendi të ri botëror, i cili parashikohet të sfidojë atë aktual të kryesuar nga Shtetet e Bashkuara të Amerikës.
Mes temave që Vuçiç mendon se do të diskutojë me presidentin e Kinës, është bashkëpunimi ekonomik, zhvillimet globale, por edhe situate me Kosovën dhe tensionet në Bosnje dhe Hercegovinë. (A2 Televizion)
A2 CNN Livestream
MUND TE LEXONI GJITHASHTU
