Ushtria e Izraelit është tërhequr nga qyteti Jenin në Bregun Perëndimor. Ajo që mbeti pas në operacionin 9-ditor ishte shkatërrim, frikë në kampin e refugjatëve dhe disa kortezhe funeralesh.
Të paktën 36 palestinezë janë vrarë, konfirmon ministria e shëndetësisë e këtij territori. Shumica e viktimave thuhet të jenë anëtarë të grupeve të armatosura, por autoriteti palestinez njofton se mes tyre ka civilë, madje edhe fëmijë, raporton A2 CNN.
“Ata na kanë trembur. Të gjithë ata që ranë dëshmorë në këtë operacion burracak, janë të afërmit tanë. Ata ia dolën mbanë në vrasjen dhe bombardimin e njerëzve. Por ata nuk do të zhdukin njerëzit. Ne nuk do të largohemi nga kampi, edhe nëse ai është i shkatërruar”, thotë Hammoudi Abdul Kamel, banor në jenin, vëllai i 3 personave të vrarë.
“Kjo radhë ishte më e vështirë. Në dhjetor erdhën me qentë e tyre, që më sulmuan. Këtë herë ishte shkatërrim total. Asgjë nuk mbeti siç ishte. Ma shkatërruan gjithë shtëpinë. Ata nuk po na lënë më asgjë. Zoti na e lehtësoftë”, thotë Sabrine Abul Kamel, banore në Jjenin.
Kampi i refugjatëve në Jenin të Bregut Perëndimor konsiderohet nga Izraeli si një bastion i militantëve, por që ka një popullatë prej 60 mijë personash. Trupat e shtetit hebre zhvilluan aty aksionin më të madh të viteve të fundit duke pretenduar se po veprojnë kundër terrorizmit. Një ushtar izraelit humbi jetën gjatë operacionit, shkruan A2 CNN.
Ndryshe nga Bregu Perëndimor, sulmet në Rripin e Gazës nuk kanë ndalur. Agjencia palestineze e lajmeve, Wafa, raporton për mbi 11 persona të vrarë në disa bombardime izraelite në qytetin e Gazës. Raportohet se mes viktimave janë gra dhe fëmijë. Organizata e Kombeve të Bashkuara jep alarmin e rëndë se 1 milionë persona në enklavën palestineze janë pa ushqim. “Kjo po shkon përtej katastrofës”, ka konfirmuar një zëdhënës i OKB-së. (A2 Televizion)
A2 CNN Livestream
MUND TE LEXONI GJITHASHTU
