Qëndroi përreth 12 orë i fshehur pas një shkurreje. Ryan Routh, po shpresonte që Donald Trump të shkonte në atë zonë për të luajtur golf, që më pas ta vriste. Ky është një detaj që ka dalë në hetimin e FBI mbi atentatin e dytë kundër ish presidentit, që duket se do të konfirmojë pistën e improvizimit nga ana e një personi të paqëndrueshëm mendërisht.
“Ne e shqyrtojmë këtë më shumë seriozitet dhe jemi të përkushtuar për të gjetur përgjigjet e nevojshme se çfarë çoi në këtë zhvillim”, tha Jeffrey b. Veltri, agjent i FBI.
Ish-presidenti ishte në gropën e pestë të fushës së golfit, një zonë ngjitur me rrugët e frekuentuara pranë Aeroportit Ndërkombëtar Palm Beach, kur një pjesëtar i mbrojtjes së tij vuri re një grykë arme që dilte nga shkurret afër vrimës së gjashtë.
Trump, i cili u evakuua i padëmtuar, tregoi se kishte dëgjuar “ndoshta katër ose pesë” të shtëna në një distancë të afërt. Drejtuesit e FBI, shërbimit sekret dhe agjencive të tjera ligjzbatuese, garantojnë se autori do të përballet me drejtësinë.
Ryan Wesley Routh, që u arrestua pak kilometra nga tentativa e tij për arratisje, doli para një gjykate amerikane. Drejtësia i shqiptoi atij dy akuza federale, përfshirë posedim të paligjshëm arme, përveç akuzës për atentatin kundër Trump. Autoritetet konfirmojnë se ai ka një historik të gjatë kriminale në Karolinën e Veriut. Në rrjete sociale është një kritik i zëshëm i ish presidentit dhe një mbështetës i Ukrainës. “Ne po kontrollojmë çfarë ai ka publikuar dhe çdo kërkim që ka bërë online”, tha Jeffrey.
CNN shkruan se autori ishte një lloj “luftëtari tastiere” për shkak të postimeve që publikonte në rrjete sociale. Kryesisht përdorte Twitte-r, që tani njihet si X, ku disa ditë përpara se Rusia të niste luftën, shkruante: “Jam gati të shkoj në Ukrainë për të luftuar dhe të vdes atje”.
Në një publikim tjetër i premtonte Zelenskit se mund t’i siguronte me mijëra civilë për t’ju bashkuar luftës. Agjentët amerikanë aktualisht po analizojnë armën që posedonte, dy kamerat, çantën dhe sendet e tjera që la pas në skenën e ngjarjes. Ajo që mbetet ende pa përcaktuar është nëse Routh veproi i vetëm. Autoritetet konfirmojnë se gjithçka do të zbulohet, nëse ai ka qenë pjesë e ndonjë plani më të madh konspiracioni. (A2 Televizion)
A2 CNN Livestream
MUND TE LEXONI GJITHASHTU
