Mbrëmja e tretë e Konventës Kombëtare Demokrate ishte plotësisht e Tim Waltz. Bashkëgaruesi i Kamala Harris për presidencialet amerikane pranoi zyrtarisht nominimin e partisë, ndërsa tregoi historinë e jetës së tij private dhe politike.
Nga vështirësitë e mëdha për të pasur një fëmijë nga politikat e ashpra për aftësitë riprodhuese në Shtetet e Bashkuara, te e shkuara e tij si trajner në shkollën e mesme e deri te zgjedhjet e nëntorit, Waltz elektrizoi demokratët duke kërkuar që të punohet deri në ditën e fundit përpara votimit për ta fituar përballjen me republikanët.
“Ne kemi dhe 76 ditë. Nuk janë asgjë. Do të kemi kohë për të fjetur kur të vdesim. Do të japim gjithçka në fushë. Kështu do të ecim përpara. Kështu do ta thyejmë Donald Trump-it. Kështu do të ndërtojmë një vend ku punëtorët janë të parët, ku njerëzve u mundësohet shëndetësia, strehimi dhe të drejtat e njeriut dhe ku qeveria qëndron jashtë dhomës suaj të gjumit”, tha Tim Waltz, kandidat demokrat për nënpresident në SHBA.
Ish-presidenti amerikan, Bill Clintin, bëri paraqitjen e 12 radhazi në Konventën Demokrate duke vlerësuar Harris dhe sulmuar kandidatin republikan, Donald Trump.
“Tani t’i themi disa gjëra troç. Unë jam shumë i vjetër. Dy ditë më parë mbusha 78 vjeç, njeriu më i moshuar në familjen time për një gjeneratë. E vetmja kotësi personale që dua të pohoj është se ende jam më i ri se Donald Trump. Kamala Harris do të punojë për të zgjidhur problemet tona, për të kapur mundësitë dhe lehtësuar frikërat tona. Ajo do të sigurohet që çdo amerikan, pavarësisht se si do të votojnë, do të ketë një shans për të ndjekur ëndrrat e tyre”, tha Bill Clinton, ish-president i SHBA.
Oprah Winfrey bëri një paraqitje surprizë. Personaliteti i njohur mediatik kritikoi bashkëgaruesin e Trump, J.D Vance për komentet e tij për gratë pa fëmijë.
“Kur një shtëpi është në flakë, ne nuk pyesim pronarin e saj për racën apo besimin fetar. Ne nuk hamendësojmë kush është partneri i tij apo si kanë votuar. Ne thjesht bëjmë më të mirën për ta shpëtuar. Nëse shtëpia i përket një gruaje pa fëmijë dhe me mace… atëherë ne përpiqemi që ta shpëtojmë edhe macen gjithashtu”, u shpreh Oprah Winfrey, personalitet mediatik.
Mbrëmja e katërt dhe përmbyllëse do t’i kushtohet Kamala Harris, ku do të pranojë zyrtarisht nominimin dhe do të paraqesë disa prej premtimeve kryesore. (A2 Televizion)
A2 CNN Livestream
MUND TE LEXONI GJITHASHTU
