Forcat e Mbrojtjes së Izraelit vranë liderin e Hamasit, Yahya Sinwar, gjatë një sulmi në Gaza. Lajmi fillimisht ishte kontradiktor, por më pas u konfirmua nga ministri i Jashtëm i Izraelit, Israel Katz.
Sinwar drejtoi operacionet e Hamasit në Gaza që nga viti 2017 dhe ai besohet të jetë arkitekti kryesor i sulmit të 7 tetorit 2023, në të cilin militantët palestinezë vranë 1200 njerëz në Izrael, shkruan A2 CNN.
“Kjo është një fitore e madhe ushtarake dhe morale për Izraelin dhe gjithë botën e lirë kundër boshtit radikal islamik të së keqes të udhëhequr nga Irani”, tha Katz.
“Eleminimi i Sinwar krijon mundësi për të liruar menjëherë pengjet dhe për të sjellë një ndryshim që do të çojë në një realitet të ri në Gaza pa Hamasin dhe pa kontrollin iranian”, tha ai.
Kur lajmi për vdekjen e mundshme të Yahjah Sinwar përfshiu rrjetet sociale, brohoritjet shpërthyen në Sderot, në jug të Izraelit. Qyteti vuajti si askush tjetër nga raketat nga Gaza dhe u pushtua nga turma terroriste e Hamasit më 7 tetor 2023.
Ishin të dhënat e ADN-së së dhëmbëve të cilat ndihmuan Izraelin të identifikonte trupin e liderit të vrarë të Hamasit, Yahya Sinwar, tha një zyrtar amerikan dhe ish-zyrtar i njohur me këtë çështje. Qeveria izraelite ka biometrikën e Sinwarit sepse ai kaloi më shumë se dy dekada në burgun izraelit për vrasje.
Sinwar ishte në një ndërtesë në Rafah në pjesën jugore të enklavës bregdetare dhe u gjet rastësisht, tha një nga zyrtarët izraelitë. Ndërtesa ishte mjedisi i një operacioni rutinë të IDF të enjten, sipas të njëjtit zyrtar dhe një zyrtari të tretë izraelit të njohur me situatën. Zyrtarët izraelitë thanë se janë gjithnjë e më të shqetësuar për fatin e pengjeve që ende mbahen brenda enklavës dhe janë të shqetësuar se në prag të eliminimit të Sinwar, luftëtarët e Hamasit do të hakmerren për vdekjen e tij duke vrarë robërit që ende mbahen në enklavë. Vrasja e Sinwar mund të prishë ndjeshëm operacionet e Hamasit dhe të avancojë qëllimin strategjik të Izraelit për të eliminuar Hamasin si një kërcënim ushtarak.
SHBA është e shqetësuar se, nëse Mohammed Sinwar, vëllai i Yahja, merr komandën, “negociatat dështojnë plotësisht” tha një zyrtar amerikan, citon CNN. (A2 Televizion)
A2 CNN Livestream
MUND TE LEXONI GJITHASHTU
