Përpara mijëra njerëzve që thërrisnin emrin e saj, Kamala Harris pranoi zyrtarisht nominimin nga radhët e demokratëve si kandidate për presidentet e Shteteve të Bashkuara.
Teksa premtoi një rrugë të re për të gjithë amerikanët, në ditën e katërt të Kuvendit Kombëtar Demokrat, Harris u shpreh se nëse fiton në zgjedhjet e nëntorit do të jetë presidente e të gjithëve.
"Në këto zgjedhje, kombi ynë ka një mundësi të çmuar, për të tejkaluar hidhërimin, cinizmin dhe betejat përçarëse të së kaluarës. Një shans për të përcaktuar një rrugë të re përpara, jo si anëtarë të një partie apo fraksioni, por si amerikanë. Do të jem një presidente që na bashkon të gjithëve rreth aspiratave tona më të mëdha. Një presidente që udhëheq e dëgjon, që është realiste, praktike. Që vepron në mënyrë të arsyeshme dhe gjithmonë lufton për popullin amerikan”, tha Harris.
Një pjesë të mirë të fjalimit të saj zv/presidentja aktuale ia kushtoi prejardhjes dhe familjes së saj.
“Nëna ime ishte 19 vjeçe kur përshkoi botën e vetme, duke udhëtuar nga India në Kaliforni me një ëndërr të palëkundur, për të qenë shkencëtarja që do të kuronte kancerin e gjirit”, tha ajo.
Donald Trump ishte po ashtu në fjalimin e Kamala Harris, me zv/presidenten që nënvizoi të “gjitha rreziqet” që ai paraqet sipas saj nëse merr një mandat të dytë.
"Në shumë mënyra Donald Trump është një njeri joserioz, por pasojat e rikthimit të Donald Trumpit në Shtëpinë e Bardhë janë jashtëzakonisht serioze. Kini parasysh pushtetin që ai do të ketë – veçanërisht pasi Gjykata e Lartë e Shteteve të Bashkuara vendosi që ai të gëzojë imunitet nga ndjekja penale”, tha ajo.
Po ashtu Harris përsëriti edhe njëherë qëndrimin se Shtetet e Bashkuara do të vijojnë të qëndrojnë përkrah Ukrainës dhe Izraelit.
Kamala Harris është gruaja e parë me ngjyrë dhe personi i parë me origjinë nga Azia Jugore që pranoi emërimin për presidente, nga një parti e madhe dhe nëse zgjidhet, do të jetë presidentja e parë grua e Shteteve të Bashkuara të Amerikës. (A2 Televizion)
A2 CNN Livestream
MUND TE LEXONI GJITHASHTU
