Përveç politikanëve vendas që dënuan atentatin e radhës ndaj kandidatit për president të SHBA, Donald Trump, reagim pati dhe nga disa prej liderëve botërorë.
Presidenti i Ukrainës, Volodymyr Zelensky u shpreh se është i lumtur që Trump është i sigurt dhe shpëtoi pa lëndime nga kjo ngjarje. Ai shtoi se dhuna nuk ka vend në skenën politike.
Kryeministri britanik, Keir Starmer shprehu shqetësimin e tij për raportimet më të fundit nga Amerika, ku jeta e ish-presidentit Donald Trump u kërcënua për herë të dytë në një atentat, që prej korrikut.
Teksa përgatitej që të takohej me homologen italiane Meloni në Romë, Starmer ishte në të njëjtën mendje se dhuna nuk ka vend në politikë.
Një mesazh për këtë ngjarje dha dhe zv/kryeministri italian, Matteo Salvini, i cili është shfaqur haptazi si një mbështetës i Donald Trump.
“Gjyqet, dhuna, fanatikët dhe komunistët nuk do të na ndalojnë. Ne ecim përpara me kokën lart”, shkroi Salvini në rrjetet sociale, raporton A2.
Kryeministri i Izraelit, Benjamin Netanjahu deklaroi se ndihet i lehtësuar që Trump shpëtoi pa lëndime në këtë ngjarje, por shtoi se masa më të forta sigurie duhet të merren në të ardhmen, pasi nuk mund të lihet gjithçka në dorë të fatit.
Edhe kryeministri hungarez Viktor Orban i dërgoi një mesazh kandidatit të republikanëve. “Po lutemi për ty zoti President”. Ai shtoi se Trump do të jetë në rrezik derisa të kthehet në Shtëpinë e Bardhë.
(A2 Televizion)
A2 CNN Livestream
MUND TE LEXONI GJITHASHTU
