Përshkallëzimi i konfliktit mes Shteteve të Bashkuara dhe Iranit po ngre shqetësime të reja për sigurinë e tregtisë globale dhe furnizimeve me energji, pasi analistët paralajmërojnë se Teherani mund ta zgjerojë krizën nga Ngushtica e Hormuzit drejt Bab el-Mandabit, hyrjes strategjike të Detit të Kuq.
Sipas mediave të huaja, Irani ka demonstruar tashmë aftësinë për të ndërprerë transportin detar në Ngushticën e Hormuzit, ndërsa tani ekziston frika se aleatët e tij, rebelët Huthi në Jemen, mund të përdoren për të bllokuar edhe ngushticën Bab el-Mandab, një prej korridoreve më të rëndësishme për tregtinë dhe eksportet globale të naftës.
Një zyrtar i lartë i lëvizjes Huthi, Mohammed al-Fara, ka paralajmëruar se nëse Arabia Saudite vijon sulmet ndaj Jemenit, forcat e tyre janë të gatshme të mbyllin Bab el-Mandabin. Sipas tij, një skenar i tillë, i kombinuar me mbylljen e Hormuzit, mund ta çojë çmimin e naftës deri në 200 dollarë për fuçi.
Ekspertët e sigurisë vlerësojnë se një përshkallëzim i tillë do ta shndërronte konfliktin nga një përballje mes SHBA-së dhe Iranit në një krizë me pasoja të drejtpërdrejta për ekonominë botërore, duke kërcënuar dy prej rrugëve më të rëndësishme detare për transportin e energjisë.
Analistët theksojnë se rreziku kryesor nuk është domosdoshmërisht një luftë e menjëhershme në shkallë të gjerë, por një zgjerim gradual i konfliktit, ku secila palë rrit presionin pa kaluar në një përballje të drejtpërdrejtë.
Ndërkohë, ekspertët amerikanë dhe ata të Lindjes së Mesme nënvizojnë se rritja e tensioneve mund të shtojë presionin ndaj Uashingtonit dhe Teheranit për t'u rikthyer në negociata, përpara se korridoret kryesore të transportit të naftës të kthehen në zona lufte. (A2 Televizion)
A2 CNN Livestream
MUND TE LEXONI GJITHASHTU
