Izraeli do ta ketë të pamundur ta eliminojë, kush mund të jetë lideri i ri i Hamasit?

Hamasi ka mbetur pa “trurin” e vetë që nga momenti kur lideri i organizatës, Yahya Sinwar u vra në Rafah, por ka të ngjarë që kjo situatë të mos zgjasë shumë.

Duke qenë se nuk është vetëm personi që ka rëndësi për udhëheqjen e organizatës, por edhe mënyra se si është riorganizuar loja në vendet e Lindjes së Mesme dhe veçanërisht në Iran, mund të emërohet Khalil al-Haya në krye të Hamasit si pasardhës i Sinwar, shkruan A2.

Al-Haya është i vendosur në Katar, natyrisht shumë larg zjarrit të Rripit të Gazës. I mbrojtur nga Ismail Haniyeh, ish-lideri i vrarë në Teheran në muajin korrik, Khalil al-Haya po udhëheq negociatat indirekte me Izraelin për një armëpushim në Gaza për lirimin e pengjeve të rrëmbyer nga Hamasi.

Analistët theksojnë gjithashtu se "udhëheqësi i ardhshëm pothuajse me siguri do të vijë nga udhëheqja e lëvizjes në Doha" të Katarit dhe nuk do të devijojë nga kursi politik dhe ideologjik që Sinwar kishte hartuar.

Një tregues i hershëm se ai po emërohet si lideri i ri ishin komentet televizive që al-Haya bëri të premten, ku u zotua se do të përdorë vrasjen e Sinwar si motivim për të vazhduar luftën, duke thënë se pengjet "nuk do të kthehen nëse sulmi në Gaza nuk ndalet" dhe se "Izraeli duhet të tërhiqet nga Gaza dhe të burgosurit palestinezë në burgjet izraelite duhet të çlirohen", raporton A2.

Gjasat janë se Khalil al-Haya do ta afrojë Hamasin edhe më shumë me Iranin, i cili tashmë ka një marrëdhënie të ngushtë me organizatën dhe njerëzit e saj.

Ndërkohë, vdekja e Sinwar mund të çojë në shfaqjen e dy figurave të reja në Gaza: vëllait dhe krahut të djathtë të tij Mohammed Sinwar dhe Izz al-Din Haddad, i cili është kreu ushtarak i pjesës veriore të Rripit të Gazës.

Teherani natyrisht po e ndjek të gjithë çështjen me kujdes. Jane Kininmond, drejtoreshë e politikave dhe ndikimit në Rrjetin e Lidershipit Evropian, theksoi për Bloomberg se ngritja e al-Haya në pozitën udhëheqëse mund të përdoret nga Irani në avantazhin e tij, veçanërisht pasi si Hamasit ashtu edhe Hezbollahut i janë dhënë goditje dërrmuese nga Izraeli.

Siç vlerëson ajo, “pozicioni i Iranit po dobësohet, por Irani do të kërkojë as në mëngë dhe ndoshta do të donte të ishte në gjendje të ndikonte në çdo negociatë pengjesh”.

Sakaq, vlerësohet se meqenëse Al-Haya do të jetë drejtues që nga Doha, ai do të jetë një objektiv më i vështirë për t’u mposhtur nga Tel Avivi se Sinwar. "Unë nuk mendoj se Izraeli do të vriste një lider në Katar", tha Kininmond, por përsëri analistët nuk mund të përjashtojnë asgjë. (A2 Televizion)