Pas Gazës, Izraeli e çon luftën në Bregun Perëndimor. Forcat e mbrojtjes po zhvillojnë atje atë që e kanë pagëzuar si operacion të madh antiterrorist, duke shënjestruar njëkohësisht disa qyteza në territorin e pushtuar.
Në orët e para të së enjtes forcat e sigurisë thanë se kishin vrarë 5 terroristë të armatosur të cilët po fshiheshin në një xhami, në qytetin e Tulkarm. Sipas tyre në përleshjen e armatosur ishte vrarë edhe kreu një organizate terroriste lokale në Nur Shams, Muhhamad Jabber.
Një ditë më herët, të paktën 9 palestinezë u vranë gjatë mësymjeve ushtarake të izraelit në qytezat e Jenin, Tulkarm, Nablus dhe Tubas ku janë shënjestruar spitale, kampe refugjatësh dhe infrastrukturë tjetër civile.
Me luftën në Gaza që ende vijon, operacioni më i madh i Izraelit në Bregun Perëndimor në 20 vite, po shkakton alarm ndërkombëtar. Kreu i OKB, Antonio Guterres e cilësoi operacionin izraelit si tejet shqetësues dhe kërkoi që të ndalej menjëherë.
Ndërsa shefi i diplomacisë europiane Josep Borrell foli për mundësinë e sanksioneve ndaj ministrave izraelite.
“Kam nisur procedurat për t'i kërkuar shteteve anëtarë nëse e konsiderojnë të përshtatshme vendosjen në listën e sanksioneve disa ministra izraelitë të cilët po përcjellin mesazhe urrejtje kundër palestinezëve dhe po propozojnë gjëra që shkelin ligjin ndërkombëtar”.
Borrell paralajmëroi kundër zgjerimit të luftës në Gaza edhe në Bregun Perëndimor. SHBA po ashtu I kërkoi Izraelit të marrë të gjithë masat e nevojshme për të mbrojtur jetët civile në Bregun Perëndimor. (A2 Televizion)
A2 CNN Livestream
MUND TE LEXONI GJITHASHTU
