Kievi rrethohet me dronë Shahed, banorët prej orësh në vendstrehime

Kievi ka qenë në shënjestrën e qindra dronëve Shahed të lëshuara nga Rusia, pas mesnatës dhe gjatë orëve të para të mëngjesit të së hënës.

Shpërthime të fuqishme janë regjistruar në zona të ndryshme të kryeqytetit ukrainas, një pjesë e të cilave për shkak të aktivizimit të mbrojtjes ajrore që shkatërroi një pjesë të mjeteve fluturuese pa pilotë të armikut.

Sipas Ukrinform, alarmi për sulm ajror vazhdon të jetë aktiv, teksa ju kërkohet banorëve që të vazhdojnë të qëndrojnë në qendrat e strehimit, shkruan A2.

Të njëjtën thirrje bëri dhe kryebashkiaku Vitali Klitschko i cili iu drejtua qytetarëve të Kievit në Telegram. "Forcat e mbrojtjes ajrore janë aktive në Obolon. Disa dronë armikë janë mbi dhe afër kryeqytetit. Qëndroni në strehimore", tha kryebashkiaku. Alarmi ajror zgjati 5 orë. (A2 Televizion)