Lëshoi 4 raketa mbi Ukrainë dhe u zhduk, bie në Detin e Zi avioni 50 milionësh i Putin

Një avion luftarak rus Su-30SM është rrëzua në Detin e Zi. Një kanal në Telegram që përcjell lajme nga Krimeja, shkruan se avioni lëshoi raketa drejt Ukrainës, dhe më pas u zhduk nga radari.

Su-30SM, një avion luftarak me shumë funksione, thuhet se ka gjuajtur katër raketa anti-ajrore Kh-31P në drejtim të Ukrainës kontinentale gjatë misionit të tij, raporton A2.

Avioni u nis nga aeroporti Krymsk në rajonin e Krasnodarit dhe pasi u zhduk afërsisht 70 kilometra në veriperëndim të kepit të Krimesë, flota e Moskës që është stacionuar në Detin e Zi nisi një operacion kërkim-shpëtimi.

Helikopterët nga baza ajrore Kaça u dërguan menjëherë për të gjetur avionin e zhdukur dhe thuhet se identifikuan një njollë nafte rreth 3 kilometra në diametër në Detin e Zi, shkruan A2.

Po ashtu u zbuluan mbetje të avionit, përfshirë njërin krah. Megjithatë, meqenëse rikuperimi i rrënojave dështoi, nuk ka ende një konfirmim përfundimtar se çfarë ka ndodhur saktësisht me ekuipazhin e tij, transmeton A2.

Nga ana tjetër, ukrainasit pretendojnë se ishin ata që rrëzuan avionin, i cili vlen rreth 50 milionë dollarë. Shërbimi i inteligjencës ushtarake të Ukrainës (HUR) ka publikuar pamjet që sipas tyre tregojnë momentin e rrëzimit të avionit luftarak rus Su-30SM.

Ukrainasit raportojnë se forcat ruse humbën kontaktet me avionin luftarak më 11 shtator rreth orës 5:00 të mëngjesit dhe rreth tre orë më vonë nisën operacionin e kërkim-shpëtimit, duke ngritur në qiell avionë An-26 dhe helikopterë Mi-8 dhe Ka-27.

Avioni luftarak Su-30SM, i cili është në përdorim nga Forcat Ajrore Ruse që nga viti 2012, konsiderohet si një nga avionët më të avancuar të Rusisë.

Incidenti i fundit është vetëm një në serinë e përplasjeve ajrore të avionëve rusë, duke ngritur shqetësime për sigurinë dhe besueshmërinë e flotës ajrore të vendit. Në fund të gushtit, një helikopter rus Mi-8 me rreth 20 persona në bord u zhduk, ndërsa në fillim të këtij viti, një avion luftarak-bombardues Su-34 u rrëzua në Republikën e Osetisë së Veriut, me ekuipazhin që u shua plotësisht, përcjell A2.

Aksidente të ngjashme kanë ndodhur në rajone të ndryshme të Rusisë, duke përfshirë rrëzimin e një helikopteri Mi-8 në rajonin Chelyabinsk vitin e kaluar. Forcat e armatosura të Ukrainës gjithashtu shkatërruan me sukses një numër avionësh rusë në sulme gjatë këtij viti. Në qershor, ushtria ukrainase publikoi një hartë që tregon se ku ndodhën sulmet në të cilat më shumë se 30 avionë rusë u shkatërruan ose u dëmtuan. (A2 Televizion)