Zgjedhja e Khalil al-Hayyas si udhëheqësi i ri i Hamasit ka ngjallur reagime të ndryshme mes palestinezëve në Rripin e Gazës, ku për shumë banorë politika ka kaluar në plan të dytë përballë luftës, urisë dhe krizës humanitare.
Al-Hayya u zgjodh këtë javë në krye të Hamasit, pasi fitoi zgjedhjet e brendshme të lëvizjes kundër ish-kreut të zyrës politike, Khaled Meshaal.
Megjithatë, për shumë banorë të Gazës, emri i udhëheqësit të ri nuk ndryshon realitetin e përditshëm.
"Ne thjesht duam të jetojmë. Duam të hapen kalimet kufitare, të kemi ushqim, ujë dhe një jetë normale. Nuk na intereson kush na udhëheq, për sa kohë mund të jetojmë me dinjitet", tha Ali Abu Amshi, i cili gjatë luftës humbi 22 anëtarë të familjes së tij, përfshirë prindërit dhe vëllanë, përcjell A2CNN.
Edhe Noman Saleh, një 63-vjeçar që humbi fabrikën e tij gjatë luftës, shprehet skeptik se ndryshimi në drejtimin e Hamasit do të sjellë përmirësim.
"Nëse fiton al-Hayya apo dikush tjetër, kjo nuk bën ndonjë ndryshim për ne. Njerëzit janë të uritur, të poshtëruar dhe askush nuk po qëndron pranë tyre. Ne kemi nevojë për një udhëheqje që mendon për qytetarët", tha ai.
Nga ana tjetër, disa analistë dhe gazetarë palestinezë e konsiderojnë zgjedhjen e al-Hayyas si një sinjal se Hamasi synon të ruajë vazhdimësinë e strukturës së tij politike, pavarësisht humbjeve të shumta në drejtim gjatë luftës.
Sipas gazetarit palestinez Mahmoud Haniyeh, zgjedhja e al-Hayyas dërgon mesazhin se lëvizja nuk po largohet nga strategjia e saj dhe synon të ruajë kohezionin e brendshëm.
(A2 Televizion)
A2 CNN Livestream
MUND TE LEXONI GJITHASHTU
