Ukraina po përdoret për të krijuar kërcënime kritike ndaj sigurisë së Rusisë, duke injoruar interesat jetike të Moskës. Kështu është shprehur Presidenti rus Vladimir Putin në seancën plenare të ditës së trete të samitit të BRIC-s. Sipas tij, ata që duan t'i shkaktojnë një disfatë strategjike Rusisë nuk e dinë historinë e vendit dhe sipas tij këto janë llogaritje iluzore.
"Ata nuk e fshehin qëllimin e tyre për t'i shkaktuar një disfatë strategjike vendit tonë. Unë sinqerisht do të them se këto janë llogaritje iluzore që mund t'i bëjnë vetëm ata që nuk e njohin historinë e Rusisë dhe nuk e marrin parasysh unitetin. Forca e shpirtit të popullit të saj është krijuar ndër shekuj”, tha Vladimir Putin.
Putin shtoi se Rusia prezantoi idenë e krijimit të një sistemi sigurie të barabartë dhe të pandarë në Euroazi dhe theksoi se ai duhet të formohet mbi një bazë "gjithëpërfshirëse dhe jodiskriminuese", shkruan A2.
“Bëhet fjalë për opsionin e garantimit të sigurisë, përpjekjeve të përbashkëta, stabilitetit autentik dhe krijimit të kushteve për zhvillimin paqësor të të gjitha vendeve dhe popujve në kontinent”, shpjegoi presidenti rus.
Ai theksoi se është e nevojshme të zgjerohet prania e vendeve afrikane në Këshillin e Sigurimit të OKB-së, liderët e të cilëve u mblodhën në samitin e BRICS.
Kina dhe India u shprehën në favor të paqes në Ukrainë - pa e përmendur Rusinë si përgjegjëse.
“Tre parime nevojiten për të qetësuar situatën në Ukrainë sa më shpejt të jetë e mundur", tha presidenti kinez Xi Jinping në fillimin zyrtar të samitit, raporton A2. "Asnjë zgjerim i fushës së betejës, asnjë përshkallëzim i luftimeve dhe asnjë provokim nga asnjëra palë".
Kryeministri indian Narendra Modi kishte theksuar më parë se ai mbështeti të gjitha përpjekjet "për të rivendosur shpejt paqen dhe stabilitetin".
Ukraina i interpretoi deklaratat nga Kazan si një shenjë e mungesës së mbështetjes për pushtimin rus të Ukrainës.
“Samiti i Brics, të cilin Rusia u përpoq ta përdorte për të ndarë botën, ka treguar edhe një herë se pjesa më e madhe e botës qëndron me Ukrainën dhe përpjekjet e saj për të arritur një paqe gjithëpërfshirëse, të drejtë dhe të qëndrueshme”, tha Das në Ministrinë e Jashtme në Kiev. (A2 Televizion)
A2 CNN Livestream
MUND TE LEXONI GJITHASHTU
