Një zyrtar i lartë iranian ka paralajmëruar se konflikti që përfshin Iranin, Izraelin dhe Shtetet e Bashkuara ka kaluar në një “fazë të re”, duke hedhur poshtë spekulimet se lufta mund të përfundojë së shpejti dhe duke sinjalizuar hakmarrje të mundshme që mund të përfshijë infrastrukturën energjetike të rajonit.
Në një intervistë për CNN të dielën, zyrtari iranian tha se nuk kishte asnjë mundësi që konflikti të përfundojë në mënyrë të menjëhershme, pavarësisht disa deklaratave që sugjeronin të kundërtën. Ai shtoi se lufta po hyn në një fazë të re dhe se sulmet ndaj depove të naftës dhe karburantit të Iranit do të përballen me hakmarrje rajonale.
“Lufta ka hyrë në një fazë të re dhe sulmi ndaj depove të naftës dhe karburantit të Iranit do të përballet patjetër me hakmarrje rajonale,” tha zyrtari.
Ai paralajmëroi gjithashtu se Irani mund të shënjestrojë infrastrukturën energjetike në ditët në vijim, duke ngritur shqetësime për mundësinë e ndërprerjeve në impiantet rajonale të naftës dhe gazit, që mund të kenë pasoja të mëdha për furnizimin global me energji.
“Irani nuk do të heqë dorë nga kontrolli i Ngushticës së Hormuzit derisa të arrijë rezultatet e dëshiruara,” theksoi ai, duke iu referuar një prej rrugëve më të rëndësishme të transportit detar në botë, përmes së cilës kalon një pjesë e konsiderueshme e furnizimeve globale me naftë.
Në fund, zyrtari iranian u shpreh se Teherani do të përcaktojë vetë kohën dhe mënyrën se si do të përfundojë konflikti, duke lënë të nënkuptohet se nuk ka ende një ndalim të mundshëm të përshkallëzimit të luftës në të ardhmen e afërt. (A2 Televizion)
A2 CNN Livestream
MUND TE LEXONI GJITHASHTU
