Nuk është Ukraina ajo që ka nisur sulmin brenda territorit rus, duke marrë nën kontroll disa zona. Pas këtij operacioni qëndron Anglia. Të paktën kështu mendon eksperti i çështjeve të sigurisë Dritan Goxhaj. Ai gjithashtu mendon se Shtetet e Bashkuara kanë pasur dijeni, por nuk janë përzierë në këtë çështje.
I ftuar në Ditarin e fundjavës në A2 CNN, me Erion Dushin, Goxhaj tha se në Kursk, ku Ukraina ka futur trupat e saj, nuk ka asnjë përqendrim të forcave ruse dhe territori nuk ka shërbyer si pikënisje e futjes së ushtrisë së Putinit në Ukrainë.
“Është hyrë me dy qëllime”, tha Goxhaj. “Aty është hyrë me divizion që ka pasur dy detyra. Detyra e afërt ka qenë zënia e një depoje të vjetër të armëve bërthamore në Belgorod, e cila është goditur disa herë nga ana e ukrainasve në vitin 2023 dhe që atëherë rusët i kanë lëvizur prej aty armët. Gjithsesi, nga ana propagandistike do të vlente marrja e kësaj depoje. Por as kjo nuk është arritur”.
“Detyra e dytë ka qenë zënia e centralit bërthamor në Kursk, një central i vetër, i kohës sovjetike, me dy reaktorë bërthamorë, i cili është 60 km larg kufirit me Ukrainën. Dhe në rast se do të merrej do të përdorej për shkëmbim me centralin e Zaporizhias (ndodhet në Ukrainë, i pushtuar nga forcat ruse). Kjo do t’i jepte ukrainasve mundësinë të ishin më afër Krimesë, të cilën gjithmonë ata kanë deklaruar se do ta rimarrin”, shtoi Goxhaj.
Sipas tij, të dy këto objektiva ishin të paarritshme. “Do të duheshin të paktën 3 divizione, pasi një divizion mund të avancojë deri në 20 kilometra”, tha Goxhaj. “Është një sulm që është bllokuar pas 3 ditësh, pasi rusët kanë risjellë aty forcat e tyre ushtarake”./A2 CNN (A2 Televizion)
A2 CNN Livestream
MUND TE LEXONI GJITHASHTU
