Rumania thirri të hënën ambasadorin rus pas shkeljeve të përsëritura të hapësirës ajrore të saj nga dronë dhe shpalli një punonjës të ambasadës person non grata.
"Me udhëzime nga Ministri i Punëve të Jashtme, Ambasadori i Federatës Ruse në Bukuresht u thirr sot në selinë e Ministrisë së Punëve të Jashtme", tha Ministria e Jashtme në rrjetin social amerikan X.
Thuhet se ambasadori u thirr si një "përgjigje e vendosur" ndaj shkeljeve të përsëritura të hapësirës ajrore të Rumanisë gjatë tre ditëve të fundit, 24-26 korrik, dhe se forcat e armatosura rrëzuan tre dronë.
“Diplomatit rus iu paraqitën fragmente të një droni të shkatërruar në territorin rumun, pjesë përbërëse për të cilat hetimet zyrtare të prokurorëve kanë konfirmuar se janë me origjinë ruse”, tha ministria.
Ajo i përshkroi veprimet si "të paligjshme dhe të papërgjegjshme" dhe se "është absolutisht e papranueshme dhe e patolerueshme që Federata Ruse të vazhdojë të shkelë hapësirën ajrore të Rumanisë".
Thuhet se pala rumune theksoi gjithashtu përgjegjësinë e Rusisë për incidentet dhe “për përkeqësimin e mjedisit të sigurisë rajonale”.
"Gjatë takimit, ambasadorit rus iu dorëzua një notë zyrtare verbale, duke njoftuar vendimin për të shpallur të padëshirueshëm një anëtar të misionit të Federatës Ruse në Bukuresht, duke i kërkuar atij të largohet nga territori rumun brenda 5 ditëve", tha ajo.
Ministria thirri gjithashtu ambasadorin e Rumanisë në Rusi në Bukuresht. Në përgjigje të këtij veprimi, zëdhënësja e Ministrisë së Jashtme ruse, Maria Zakharova, i përshkroi akuzat dhe pretendimet e Bukureshtit si “të pabaza”. “Këto veprime jomiqësore do të marrin një përgjigje të duhur”, i tha ajo agjencisë shtetërore ruse të lajmeve TASS.
(A2 Televizion)
A2 CNN Livestream
MUND TE LEXONI GJITHASHTU
