Veçse ka marrë përsëri përsipër që kërcënimet për Perëndimin t’i bëjë vetë drejtpërdrejtë, Presidenti rus Vladimir Putin ka zbritur edhe në terren, për të parë se si porositë e tij po shkojnë, sa i takon rekrutimeve të reja në ushtri e mbi të gjitha, atë që e sheh edhe si të ardhmen e luftës, bombardimeve nga ajri përmes dronëve.
Të shpeshta kanë qenë vizitat në fabrikat e prodhimit të dronëve apo pajisjeve të tjera elektronike, siç ishte rasti më i fundit në fabrikën e Shën Pjetërburgut.
I shoqëruar nga disa zyrtarë të lartë rus, përfshirë edhe ministrin e Mbrojtjes, Andrei Belousov, shefi i Kremlinit vizitoi nga afër dizajnet dhe prodhimin e disa llojeve të ndryshme të dronëve.
Synimi, sipas tij, ishte prodhimi 10-fish më shumë brenda këtij viti, për të rritur kapacitetet goditëse të rusëve nga ajri, në mënyrë që në rrugë tokësore, ushtria, këmbësoria, të kishte mundësi të avanconte edhe më shumë brenda territorit ukrainas. 1,4 milionë dronëve do duhet të rezultojnë gati për përdorim deri në dhjetor të këtij viti, vetëm kështu, sipas Putinit, ushtria ruse do mund të fitojë në Ukrainë.
Që nga nisja e asaj që Presidenti rus ende e quan operacion special ushtarak në shkurt të 2022, lufta vazhdimisht ka qenë e përcaktuar nga përplasjet me artileri të rëndë, por muajt e fundit, sipas rusëve, vetëm me sulmet me dronë ushtria e tyre ka arritur të avancojë e të fortifikojë frontin e saj të luftës, në gati 1 mijë kilometër territor dhe këtu përfshihen mijëra ushtarë.
Të dyja ushtritë, edhe ruse dhe ajo ukrainase, kanë siguruar dronë në masë, por tashmë të dy vendet po kërkojnë të rrisin edhe më shumë prodhimin e tyre brenda vendit. Vetëm kështu, në strategjitë e tyre, shënjestrat janë më të lehta për t’u goditur. Vetëm përmes dronëve, sipas dy ushtrive, mund të shkatërrohen luftëanijet, artileria e rëndë dhe infrastruktura kritike në fushën e armikut.
“Dua t’ju them faleminderit drejtuesve dhe stafeve të këtyre ndërmarrjeve për pajisjet cilësore dhe shumë jetike që po prodhojnë këtu. Të gjitha komplekset tona ushtarako-industriale janë vënë në punë në kapacitet të plotë, të gjitha po punojnë pa pushim. Asnjë pajisje nuk ka nevojë për kontrolle të mëtejshme, sepse e kanë provuar veten gjatë këtij operacioni special Ushtarak. Në total, i kemi dërguar ushtrisë në terren mbi 140 mijë armë e mjete luftarake të llojeve të ndryshime në 2023. Këtë vit, prodhimi i mjeteve ende pa një emër të përcaktuar, do të rritet me disa fish, gati 10-fish për të qenë më i saktë”, tha Putin.
“Po rrisim edhe prodhimin e sistemeve të reja, edhe ato ende pa një emër, për të cilat ekipet po punojnë. Përfshihen këtu edhe anije, posaçërisht për to janë përdorur platforma robotike multi-miliona-dollarëshe. Në të njëjtën kohë, në terren, po dërgojmë qindra trupa të tjera për të luftuar ballë përballë”, shtoi Putin.
“E kam thënë edhe më parë, çelsi kyç është prodhimi i armëve dhe mjeteve të reja, në seri. Duhet të prodhohen sa më shpejt, koha është decisive për të fituar luftën. Dhe sigurisht, që për të ardhmen, dronët do të jenë kryesoret për ushtrinë tonë. Marrëveshjet edhe me vendet e tjera do t’i kemi gati shpejt”, u shpreh më tej Putin.
Dhe fill pas kësaj deklarate, teksa publikisht u shfaqën pamje edhe të modeleve të dronëve luftarakë rus, ende të panjohur për pjesën tjetër të botës, ndonëse inteligjencat e huaja, sidomos ajo amerikane dhe britanike, janë në dijeni, mediat e huaja nisën menjëherë të flasin për një projekt sekret mes Rusisë dhe Kinës, për prodhimin e dronëve. Bëhet fjalë, sipas agjencisë së lajmeve Reuters, për prodhim të dronëve rusë, në fabrikat kineze, dronë me rreze të gjatë veprimi. Programi i Rusisë është gati dhe marrëveshja duket se është firmosur. Ministria e Jashtme kineze tha se nuk ishte në dijeni të një projekti të tillë dhe se Pekini ka arritur të ruajë balancën e neutralitetit në konfliktin mes Rusisë dhe Ukrainës dhe se vazhdimisht mban në kontroll masat për eksportin e dronëve. Nëse ky lajm konfirmohet, kjo do të ishte hera e parë që provohet se kompanitë e ndërmarrjet kineze i sigurojnë Moskës të gjithë sistemin e armëve, për të cilat Putin krenar thotë që prodhohen brenda Rusisë. Pekini edhe më herët e ka furnizuar Kremlinin me mjete të nevojshme, por në nivel përbërësish të domosdoshëm për të zhvilluar sistemin e armëve, por jo drejtpërdrejtë armë.
Duke cituar se informacionet e saj i kishte siguruar nga 2 burime të Agjencisë së Inteligjencës Europiane, Reuters raporton se IEMZ Kupol, filial i agjencisë shtetërore ruse të prodhimit të armëve Almaz-Antey, ka zhvilluar e tashmë ka testuar dronët e tipit Garpiya-3, (G3) në Kinë, me ndihmën e specialistëve kinezë. Dronët G3 mund të fluturojnë deri në 1900 km, me armatime deri në thuajse 50 kg. Nga kompania shtetërore ruse Kupol janë dërguar nga Kina, në qytetin rus të Izhevsk ku kompania ka zyrtat qëndrore të saj, dy modele të dronit ushtarak G3.
Një zyrtar i Këshillit të Sigurisë pranë Shtëpisë së Bardhë, tha se Uashingtoni është thellësisht i shqetësuar për këtë raport, por Shtetet e Bashkuara thotë se ende nuk janë të bindur, se sa dhe deri ku qeveria kineze është investuar në këtë projekt.
1,4 milionë dronë luftarakë ka urdhëruar Putin brenda këtij viti, me synimin që vitin 2025 ta nisë me një fushatë bombardimesh nga ajri të Ukrainës, siç ka bërë javët e fundit. E teksa Kremlini kërkon të rrisë e të blindojë arsenalin e tij ushtarak, Irani raportohet se po përpiqet të marrë ndihmë nga Rusia, për mbijetesën e luftimet e grupit militant që targeton Izraelin, në Lindjen e Mesme. Zyrtarët rajonal thanë për Reuters se Irani ka ndërmjetësuar bisedime sekrete mes Moskës dhe rebelëve huthi, për të transferuar dhjetëra raketa të avancuara për grupin militant.
Delegatë nga të dy vendet janë takuar në Teheran, 2 herë brenda këtij viti, ndërsa pritet një tjetër takim për pak javë, në kryeqytetin iranian.
“Dronët” rusë janë vazhdimisht në qiell. Ata monitorojnë vazhdimisht territorin tonë, gjatë të gjithë frontit të betejës, tha një anëtar i Ministrisë ukrainase të Mbrojtjes. Për këtë arsye, gjatë shtatorit, NATO zhvilloi në Holandë një stërvitje të përbashkët ushtarake. Ushtrimet përfshijnë edhe testimin e teknologjive më të fundit antidronë. Është si loja macja dhe miu, tha Matt Roper, shef i inteligjencës së kësaj stërvitje të përbashkët, pjesë e departamentit të teknologjisë dhe sulmeve kibernetike të NATO. “Kemi mësuar dhe jemi trajnuar tashmë pas asaj që kemi parë në Ukrainë dhe po përshtasim teknologjinë tonë, kundër tyre”.
Vetëm në këtë stërvitje të përbashkët në Holandë, janë përdorur më shumë se 50 teknologji të ndryshme të dronëve luftarakë, me pjesëmarrëse 19 vende anëtare të NATO-s. Dronët dukshëm janë në këtë pikë të luftës, pas 950 ditëve përballje në terren, shqetësimi më i madh për Ukrainën dhe Perëndimin. (A2 Televizion)
A2 CNN Livestream
MUND TE LEXONI GJITHASHTU
