Izraeli nuk do të tërheqë forcat e tij nga kufiri mes Gazës dhe Egjiptit. Burime diplomatike për gjigandin amerikan CNN theksojnë se edhe pas skadimit të marrëveshjes së armëpushimit mes Hamasit dhe Izraelit ushtria e këtij të fundit do të mbetet atje.
Ushtria izraelite supozohej të fillonte tërheqjen nga ai rajon në fillim të marsit, nëse armëpushimi aktual, i cili skadon të shtunën, do të zgjatej.
Burime për CNN citojnë mesazh dërguar mediave izraelite të enjten, ku thuhej: "Ne nuk do të dalim nga Korridori i Filadelfit", një brez 14 kilometra (8 milje) përgjatë kufirit Gaza-Egjipt.
"Ne nuk do t'i lejojmë vrasësit e Hamasit të bredhin përsëri me kamionë dhe pushkë në kufijtë tanë dhe nuk do t'i lejojmë ata të forcohen përsëri përmes kontrabandës."
Ushtria izraelite mori kontrollin e korridorit në maj dhe do të tërhiqej prej tij gjatë një faze të dytë të mundshme të marrëveshjes së armëpushimit. Nuk është e qartë nëse negociatat për një fazë të dytë kanë filluar.
Sakaq, grupi militant Hamas tha të enjten se ishte gati të fillonte bisedimet për fazën e dytë të armëpushimit në Gaza pasi disa qindra palestinezë u liruan nga burgjet izraelite brenda natës në këmbim të trupave të katër pengjeve izraelite.
Izraeli tha se tre nga pengjet trupat e të cilëve i kishte marrë gjatë natës ishin vrarë në robëri dhe i katërti ishte vrarë në ditën e sulmit të Hamasit në tetor 2023 në Izrael që përshpejtoi luftën.
Nuk pati asnjë përgjigje të menjëhershme nga Hamasi për pretendimin se pengjet ishin vrarë në robëri. Grupi ka mohuar më parë vrasjen e pengjeve dhe tha se disa kishin vdekur si rezultat i bombardimeve izraelite. (A2 Televizion)
A2 CNN Livestream
MUND TE LEXONI GJITHASHTU
