Shtatë banorë të Jerusalemit Lindor janë arrestuar me dyshimin për planifikimin e sulmeve në Izrael, duke përfshirë vrasjen e një shkencëtari bërthamor izraelit dhe një kryebashkiak në Izraelin qendror. Kjo është bërë të ditur për mediat ndërkombëtare nga Shin Bet (siguria e brendshme) dhe policia.
Ditën e djeshme janë arrestuar edhe shtatë persona të tjerë të akuzuar se kanë fotografuar dhe mbledhur informacione në vende të ndjeshme ushtarake, shkruan A2.
Të dyshuarit që përfunduan në pranga sot janë të moshës nga 19 deri në 23 vjeç, thonë zyrtarët e policisë dhe Shin Bet. Udhëheqësi i grupit, një 23-vjeçar i quajtur Rami Alian, thuhet se ishte rekrutuar nga një agjent iranian.
Alian iu dha një fotografi dhe adresa e një shkencëtari bërthamor dhe iu tha se do të paguhej 53,000 dollarë nëse do të kishte sukses. Sipas Channel 12, Alian u tha hetuesve se ishte i vetëdijshëm se punonte për iranianët dhe donte të rrezikonte sigurinë kombëtare, raporton A2.
Asnjë nga të dyshuarit nuk kishte të dhëna kriminale apo të sigurisë. Qeliza ishte aktive për rreth dy vjet. Atyre iu caktuan misione të ndryshme për të cilat paguheshin mijëra dollarë.
Të dyshuarit, mes të cilëve edhe dy të mitur, ishin ngarkuar nga dy agjentë nga shërbimi i inteligjencës iraniane për të kryer qindra detyra për mbledhjen e informacionit në bazat ushtarake në të gjithë vendin, thuhet në deklaratën izraelite, shkruan A2.
Objektivat përfshinin një termocentral në qytetin verior të Hadera, baza ushtarake, forcat ajrore dhe marinën, si dhe portet e mbrojtjes ajrore të Iron Dome të Izraelit.
Në shtator, shërbimet e sigurisë izraelite arrestuan një shtetas izraelit të dyshuar për përfshirje në një komplot vrasjeje të mbështetur nga Irani kundër njerëzve të shquar, përfshirë kryeministrin. (A2 Televizion)
A2 CNN Livestream
MUND TE LEXONI GJITHASHTU
