La pas xhamin antiplumb dhe snajperët në çati, për të shkuar në Arizona ku inspektoi murin e tij në kufirin mes Shteteve të Bashkuara dhe Meksikës. Kandidati republikan dhe ish-presidenti amerikan, Donald Trump, sulmoi rivalen demokrate Kamala Harris. Ai e konsideroi nën presidenten aktuale si një komuniste që nuk përfundoi kurrë murin kundër emigrantëve.
“Ne jemi sot këtu në kufirin jugor në Arizona, ku shoqja Kamala Harris, unë e quaj shoqe sepse është një marksiste radikale e majtë, po kërkon kufij të hapur. Ajo do që vendi ynë, nuk e kuptoj pse dikush do ta dëshironte atë gjë, por ajo dëshiron që vendi ynë të jetë i hapur ndaj kriminelëve të botës”, tha Donald Trump, kandidat republikan për president.
Më pas, ashpërsoi sulmet ndaj Harris, si një reagim ndaj fjalimit të demokrates në përmbyllje të Konventës Kombëtare, shkruan A2 CNN.
“Dhe ne kemi një marksiste që po kandidon dhe nuk mendoj se mund ta lejoni. Ky vend nuk është gati për një presidente marksiste. Ajo nuk do ta ndërtojë kurrë murin. Ne kishim një car kufiri. Ajo e donte këtë titull, por nuk donte ta përfundonte murin sepse ishte dembele”, tha Trump.
Trump u pyet nga reporterët lidhur me një person në Arizona që kërcënonte në rrjete sociale se do ta vriste ish-presidentin amerikane. “Nuk suprizohem ta dëgjoj këtë, por jam në shënjestër pasi do të dëmtoj njerëzit e këqij”, ishte përgjigja e tij. Muajin e kaluar, Trump i shpëtoi një atentati ku mbeti i plagosur në vesh. Gjuha e tij është ashpërsuar ndjeshëm kohët e fundit në sulmet ndaj rivales demokrate pasi Harris ka mbledhur shumën rekord prej 500 milionë dollarësh në vetëm një muaj. Gjithashtu sondazhet favorizojnë Harris me 46.6% të preferencave kundrejt 43.8% që zotëron Trump. /A2CNN (A2 Televizion)
A2 CNN Livestream
MUND TE LEXONI GJITHASHTU
