Askush nuk e di se si do të zhvillohet situata më tej në rajonin e Kurskut. Kështu është shprehur Sekretari i Përgjithshëm i NATO-s, Jens Stoltenberg. Në një prononcim për mediat, shefi i aleancës veriatlantike deklaroi se Ukraina ka arritur “shumë” në ofensivën e saj në Kursk, por është e vështirë të thuhet se si do të zhvillohet situata më pas.
“Vetëm ukrainasit mund të bëjnë zgjedhjet e vështira që nevojiten, të tilla si ku të vendosin forcat e tyre dhe çfarë lloj lufte është e përshtatshme në këtë situatë. Më vjen mirë që shumë vende të NATO-s e kanë dhënë këtë mundësi dhe ato që ende kanë kufizime i kanë zbutur kufizimet në mënyrë që Ukraina të mund të mbrohet”, deklaroi Stoltenberg.
Stoltenberg shtoi më herët në një konferencë se nuk sheh ndonjë kërcënim të menjëhershëm ushtarak kundër vendeve të NATO-s, por tha se ekziston një rrezik i vazhdueshëm i terrorizmit, sulmeve kibernetike dhe sabotazhit nga Rusia. Stoltenberg tha se Ukraina ka të drejtën e vetëmbrojtjes, duke përfshirë raketat me rreze të gjatë që mund të arrijnë objektiva ushtarake në territorin rus.
Ndërkohë, raportohet se numri i të vdekurve nga sulmi me raketa ruse në Poltava u rrit në 55 persona, ndërsa 328 të tjerë u plagosën. Kështu ka deklaruar Shërbimi Shtetëror i Emergjencave në Ukrainë. Forcat ruse bombarduan një zonë të banuar në qytetin lindor të Ukrainës të mërkurën, duke vrarë një person dhe duke plagosur tre të tjerë, thanë zyrtarët lokalë. Ushtarakët ukrainas në rajonin lindor të Donetskut, në një raport të shfaqur në aplikacionin e mesazheve Telegram, thanë se sulmi u krye me raketa të shumta.
Sakaq, të tjera fakte janë bërë publike për arsyen e vërtetë të largimit të Ministrit të Jashtëm të Ukrainës, Dmitro Kuleba. Sipas revistës Politico, ka të ngjarë që ministri i Jashtëm të jetë detyruar të japë dorëheqjen për shkak të përplasjeve me shefin e zyrës së Volodymyr Zelensky, Andriy Yermak.
“Të gjithë e dinin se kishin një konflikt. Madje, një herë isha dëshmitar i një episodi të tillë”, tha zyrtari anonim për Politico.
“Falë pozicionit të tij, Kuleba kishte kontakte të vendosura të drejtpërdrejta me Blinken, me Baerbock dhe shumë të tjerë. Edhe sikur të ishte 300% besnik, zyra e Presidentit nuk mund t'i linte një kanal të tillë komunikimi në duart e një personi”, citon Politico.
Ndërkohë, Parlamenti i Ukrainës ka votuar Andriy Sybiha si Ministër të ri të Punëve të Jashtme të Ukrainës. Për vendimin në fjalë votuan 258 deputetë. (A2 Televizion)
A2 CNN Livestream
MUND TE LEXONI GJITHASHTU
