Tre persona janë vrarë pas një sulmi në kufirin mes Jordanisë dhe Bregut Perëndimor të pushtuar. Këtë e konfirmuan autoritetet e Izraelit, që shtojnë se viktimat ishin civilë.
Autori ishte afruar kufirit duke u fshehur në një kamion. Ushtria e Izraelit kanë ndërhyrë duke vrarë agresorin dhe më pas kontrolloi kamionin mes frikës se mund të kishte pajisje shpërthyese.
Autoritetet e Jordanisë bëjnë të ditur se mbyllën përkohësisht kufirin dhe po hetojnë incidentin. Kryeministri izraelit, Benjamin Netanjahu, dënoi sulmin të cilin e konsideroi terrorist.
“Ne jemi të rrethuar nga ideologjia vrastare e udhëhequr nga aksi i së keqes së Iranit. Në ditët e fundit, terroristët kanë vrarë 6 pengje izraelite dhe 3 oficerë policie. Vrasësit nuk bëjnë dallim mes nesh, por kërkojnë të na vrasin të gjithëve, deri në izraelitin e fundit”, tha kryeministri Netanyahu.
Kjo vjen mes një zemërimi të shtuar kundër qeverisë. Rreth 500 mijë njerëz protestuan për lirimin e pengjeve dhe kundër kryeministrit Netanjahu vetëm në Tel Aviv. Një shifër kjo që nëse konfirmohet, do të vendoste një rekord në historinë e Izraelit, për sa i përket manifestimeve.
Sipas raportimeve, disa persona janë arrestuar pas protestave. Pjesëmarrësit kërkojnë nga qeveria që të arrijë një marrëveshje me Hamasin për t’I dhënë fund luftës në Gaza dhe kthimin e të gjitha pengjeve në shtëpi.
Ndërkohë, Izraeli është detyruar që të merret dhe me një front tjetër. Militantët e Hezbollahut kanë lëshuar raketa në veri të vendit. (A2 Televizion)
A2 CNN Livestream
MUND TE LEXONI GJITHASHTU
