Protesta qytetare kulmoi mbrëmë me tubimin e katërt kombëtar në sheshin para Kryeministrisë. Me kërkesat e pandryshuara, ku kryeson dorëheqja e Edi Ramës si Kryeministër, qytetarët, të cilëve iu bashkuan edhe shqiptarë të diasporës, protestuan për disa orë para godinës së Kryeministrisë.
Por ndryshe nga ditët e shkuara në këtë protestë të katërt kombëtare simbolika ndryshoi. Flamujve kuq e zi, pankartave dhe thirrjeve “Rama burg”, “Berisha burg”, “Rama jep dorëheqjen” apo “Shqipëri e re”, iu shtuan edhe disa elementë.
Për kryeministrin Rama, që dje festoi ditëlindjen, protestuesit i kishin një tortë prej betoni. Simbolika lidhet me investimin në Zvërnec, pasi tortës i ishin vënë edhe disa flamingo. Ndërsa në majë të tortës shkruhej “Shumë burg për ty!”. “Edhe 100 vite në burg!”, ishte ‘urimi’ i tyre. Torta shoqërohej edhe nga një paradë flamingosh. Një tjetër simbolikë erdhi në protestën para Kryeministrisë. Studentët sollën një statujë të ideuar për të përfaqësuar kryeministrin Rama, e cila ishte me syze të kuqe. Në qafë i kishin varur një fletë ku shkruhej “Diktatori i fundit”.
Duke kujtuar rrëzimin e bustit të Enver Hoxhës më 20 shkurt 1991, ata rrëzuan edhe këtë statujë, duke e ndarë më dysh dhe shkelmuar, si “surprizë” për 62-vjetorin.
Protesta tashmë ka hyrë në muajin e dytë, ndërsa mbetet e paqartë se si do të vijojë në ditët në vijim. Qeveria nuk ka trajtuar pesë kërkesat e paraqitura nga protestuesit, ku kushti i panegociueshëm mbetet largimi i kreut të qeverisë. Nga ana e tij, Rama është shprehur i vendosur të qëndrojë në detyrë deri në përfundim të mandatit dhe ka deklaruar se zgjedhjet parlamentare do të mbahen në vitin 2029.
(A2 Televizion)
A2 CNN Livestream
MUND TE LEXONI GJITHASHTU
