Grupi Parlamentar i PD-së i ka dërguar një letër zyrtare ambasadave në Tiranë, duke shprehur shqetësimin për zhvillimet e fundit në sistemin e drejtësisë, veçanërisht mbledhjen e Kolegjeve të Bashkuara të Gjykata e Lartë e Shqipërisë më 9 prill për shqyrtimin e masës së sigurisë “arrest në burg”.
Në letër, kryetari i Grupit Parlamentar, Gazment Bardhi, thekson se iniciativa është një nismë personale e kryetarit Sokol Sadushi, pa justifikim ligjor, dhe vjen në një moment delikat për luftën kundër korrupsionit. Ai thekson se një interpretim më i butë i masës së paraburgimit mund të ndikojë te zyrtarët e lartë politikë dhe figurat e krimit të organizuar që aktualisht ndodhen nën masa sigurie.
"Aktualisht, i vetmi zyrtar i lartë në detyrë që ndodhet në burg është Kryetari i Bashkisë së Tiranës, Erion Veliaj. Gjithashtu, ky vendim mund të ndikojë edhe disa figura të profilit të lartë të krimit të organizuar që aktualisht ndodhen në paraburgim", thuhet në letër.
Letra përmend edhe shqetësimet e ngritura nga deklaratat publike të përfaqësuesve të lartë të ekzekutivit, duke nënvizuar mundësinë e ndikimit ose presionit ndaj institucioneve të drejtësisë.
PD kërkon që "ambasadat të monitorojnë procesin në Gjykatën e Lartë, të inkurajojnë transparencën dhe respektimin e standardeve ndërkombëtare të shtetit të së drejtës, si dhe të mbështesin institucionet shqiptare në garantimin e një drejtësie të paanshme dhe të pavarur".
Sipas PD, 'besimi i publikut në sistemin e drejtësisë është thelbësor për stabilitetin demokratik dhe integrimin evropian të Shqipërisë, dhe çdo vendim me ndikim të gjerë duhet të bazohet në parime ligjore dhe të mbrohet nga perceptimi i ndikimit politik". (A2 Televizion)
A2 CNN Livestream
MUND TE LEXONI GJITHASHTU
