Episodin e radhës të podkastit “Flasim”, kryeministri Rama e nisi me vendimet e Bordit të Transparencës. Sipas tij bordi është vënë në lëvizje për të synuar parandalimin e abuzimeve në dëm të konsumatorëve shqiptarë. Ai tha se të dhënat në bursën e Mesdheut kanë sjellë ulje të çmimeve të nënprodukteve të naftës, çka është reflektuar menjëherë edhe në tregun vendas përmes vendimeve të bordit.
“Bordi i Transparencës, i cili është vënë në lëvizje për të reflektuar impaktin e luftës ndaj regjimit kriminal të Teheranit mbi çmimet në tregun e naftës, duke shmangur abuzimet me këtë impakt në dëm të konsumatorëve. Sipas dhënave të bursës së Mesdheut, në ditët e fundit pati një ulje të çmimeve të nënprodukteve kryesore të naftës dhe, në përputhje me këtë zhvillim, Bordi i Transparencës reflektoi menjëherë edhe uljen e çmimit në vend, duke bërë atë që ka detyrë të bëjë: përcaktimin e çmimeve tavan dhe pamundësimin e abuzimit me situatën në dëm të konsumatorit”, deklaroi Rama.
Ai sqaroi se mekanizmi i Bordit të Transparencës nuk vendos çmime arbitrare, por lidh drejtpërdrejt çmimet në Shqipëria me zhvillimet në tregjet ndërkombëtare. Në këtë mënyrë, sipas Ramës, garantohet që çdo rritje apo ulje të jetë rezultat i faktorëve globalë dhe jo i vendimeve të operatorëve vendas.
“Ajo që është e rëndësishme të kuptohet është se ky mekanizëm lidh drejtpërdrejt çmimet në Shqipëri me lëvizjet në tregjet ndërkombëtare dhe jo me vendime të njëanshme të operatorëve vendas. Kjo do të thotë që, në varësi nga lëvizja e çmimit në bursë, bordi qëndron vijimësisht në anën e konsumatorëve, e drejtuesve të mjeteve, e qytetarëve dhe ruan kufijtë e qartë mes çmimit të rritur objektivisht si rezultat i lëvizjes në tregun ndërkombëtar, prej ku edhe importohet nafta në Shqipëri, dhe, nga ana tjetër, abuzivitetit që, në këto raste, nëse gjen shesh, bën gjithmonë përshesh. E theksoj edhe njëherë, Bordi nuk vendos çmimin e naftës arbitrarisht, nuk ul çmimin e naftës duke vënë në rrezik vetë kapacitetet e furnizimit, por thjesht dhe vetëm mbikëqyr lëvizjen e çmimit dhe nuk u lejon operatorëve që të luajnë pas kurrizit të konsumatorëve”.
Kryeministri nënvizoi se roli kryesor i bordit është mbrojtja e konsumatorëve, duke vendosur çmime tavan dhe duke parandaluar spekulimet. Ai paralajmëroi se çdo shkelje e vendimeve do të ndëshkohet me masa të menjëhershme, deri në pezullim aktiviteti për operatorët që nuk respektojnë rregullat.
“Roli i tij është të sigurojë transparencë dhe, nga ana tjetër, të jetë gjithmonë në vëmendje për të mos lejuar edhe shkelje të vendimeve të tij, të cilat pastaj shoqërohen me masa të menjëhershme deri në pezullimin e aktivitetit për operatorët që nuk respektojnë rregullat. Deri tani duket se gjithçka funksionon ashtu siç duhet, por do të bëjmë çmos që, deri në përfundim të kësaj situate që nuk varet aspak nga ne, gjithçka të jetë transparente dhe asgjë e tepërt të mos cenojë konsumatorët”.
(A2 Televizion)
A2 CNN Livestream
MUND TE LEXONI GJITHASHTU
