Tërmeti i fuqishëm godet Kroacinë, të paktën 6 viktima

Të paktën 6 persona kanë humbur jetën dhe disa dhjetëra kanë mbetur të lënduar nga tërmeti që goditi këtë të martë Kroacinë, i magnitudës 6,4. Megjithatë, numri i saktë mbetet ende i pakonfirmuar, pasi me kalimin e orëve u vështirësua edhe operacioni i kërkim-shpëtimit.

Mes viktimave ishte edhe një vajzë 12-vjeçare, e para që u raportua se kishte humbur jetën.

Tërmeti goditi pak pas mesdite pranë qytezave Petrinja dhe Sisak, rreth 40 kilometra nga Zagrebi dhe u ndje në të gjithë Ballkanin, e deri në Hungari. Ai pasoi dy lëkundje të magnitudës 5 dhe 5,2 që goditën vendin të hënën.

Si pasojë e lëkundjeve të vazhdueshme, impianti bërthamor në Slloveni, Krsko, është mbyllur për arsye sigurie. Tërmeti i sotëm është shoqëruar edhe nga disa paslëkundje më të lehta. (A2 Televizion)