Më 5 prill 2025, disa muaj para vdekjes së tij, Giorgio Armani u paraqit te një noter milanez për të depozituar testamentin e tij sekret, të shkruar pjesërisht në kompjuter dhe pjesërisht me dorë.
“Mbreti i modës” e dorëzoi testamentin e tij të fundit, të mbyllur në gjashtë fletë letre të bardha A4, në prani të dy dëshmitarëve, shkruan A2.
I pari është Ruben Israel, bashkëpronar i firmës noteriale që përdori Armani. I dyti është një "njeri misterioz", i padëgjuar më parë, emri i të cilit doli pas publikimit të testamentit. Raporti i depozitimit rendit emrin, datën e lindjes dhe adresën e tij: Luigi Chiapparini, 73 vjeç, që jeton në San Giorgio su Legnano, në zonën metropolitane të Milanos.
Kush është Luigi Chiapparini?
“Corriere della Sera” zbulon pak nga ajo që dihet për jetën e Chiapparinit, një njeri që duket se është i panjohur për të gjithë, madje edhe për bashkëqytetarët e tij. 73-vjeçari zakonisht bën një jetë të thjeshtë në vilën e tij elegante në San Giorgio, me një kopsht të mirëmbajtur.
"Unë jam askush dhe dua të mbetem i tillë; nuk jam shfaqur kurrë askund", i tha vetë Chiapparini gazetës italiane.
Por, me çfarë merret ai? Burri "misterioz" është në fakt një bankier privat, një profesionist që ofron këshillim financiar dhe shërbime të personalizuara të menaxhimit të pasurisë për klientët me pasuri të lartë neto, duke ofruar mbështetje për investimet, planifikimin tatimor, trashëgiminë dhe sigurimet.
Bankieri privat, duke menaxhuar nevoja komplekse financiare, ndërton një marrëdhënie afatgjatë besimi me klientin. Dhe kjo është ndoshta ajo që ka ndodhur edhe me Giorgio Armanin.
Vetë Chiapparini shpjegoi se marrëdhënia e tij me Armanin, si këshilltar financiar, filloi në vitet ‘90 dhe ka vazhduar gjatë dekadave të fundit.
“Corriere della Sera” zbuloi disa detaje të tjera: Chiapparini fillimisht punoi në Cassa di Risparmio di Parma e Piacenza, më pas u transferua në Credit Suisse, tani UBS, në vitin 1999. Në UBS stilisti kishte disa llogari personale, përfshirë ato ku ai ndau dhjetëra miliona për miqtë e tij më të ngushtë. Paratë menaxhoheshin nga Chiapparini, një nga të paktët profesionistë jashtë rrethit të ngushtë të familjes dhe bashkëpunëtorëve që fituan besimin e Giorgio Armani. (A2 Televizion)
A2 CNN Livestream
MUND TE LEXONI GJITHASHTU
