Këngëtarja e njohur Katy Perry do të jetë pjesë e ekuipazhit të parë plotësisht femëror që do të udhëtojë në hapësirë me raketën “New Shepard” të kompanisë Blue Origin, në pronësi të miliarderit Jeff Bezos, shkruan A2 CNN. Ajo do të shoqërohet nga e fejuara e Bezos, Lauren Sánchez, gazetarja e CBS Gayle King, ish-shkencëtarja e NASA-s Aisha Boëe, aktivistja për të drejtat civile Amanda Nguyen dhe producentja e filmave Kerianne Flynn.
Fluturimi pritet të zgjasë rreth 11 minuta dhe do të kalojë mbi vijën Kármán, 100 kilometra mbi sipërfaqen e Tokës, që konsiderohet si kufiri ndërkombëtar i hapësirës. Raketa është plotësisht autonome dhe nuk kërkon pilotë. Ekuipazhi do të përjetojë disa momente të peshës së lehtë para se kapsula të rikthehet në Tokë me ndihmën e parashutave, ndërsa shtytësi do të ulet vetë rreth dy milje nga vendi i nisjes.
“Po të më thoshit që do të isha pjesë e ekuipazhit të parë vetëm me gra në hapësirë, do ta besoja. Asgjë nuk ishte përtej imagjinatës sime si fëmijë”, shkroi Perry në rrjetet sociale.
Kjo është hera e parë që një ekuipazh plotësisht femëror niset në hapësirë që nga viti 1963, kur Valentina Tereshkova u bë gruaja e parë në hapësirë.
Fluturimet e Blue Origin kushtojnë shumë dhe kërkojnë një depozitë prej 150 000 dollarësh për të rezervuar një vend. Megjithatë, kompania synon që në të ardhmen të bëjë hapësirën më të arritshme për të gjithë. (A2 Televizion)
A2 CNN Livestream
MUND TE LEXONI GJITHASHTU
