Kukësi vijon të jetë me një situatë të shtuar të rasteve pozitive me COVID-19, krahasuar kjo edhe me numrin e popullsisë. Që prej muajit korrik, në këtë qytet janë shënuar rritje të vazhdueshme dhe thuajse të përditshme të të infektuarve me virusin korona, me një tendencë rritje edhe tek moshat e reja dhe ato të mesme.
Por, pavarësisht shtimit të rasteve, ndërgjegjësimi qytetar mbetet ende larg zbatimit të masave antikoronavirus. Në mjediset e hapura publike qytetarët dalin të shoqëruar, pa respektuar distancën fizike. Edhe në mjedise të mbyllura, një pjesë e mirë e qytetarëve nuk vendosin maska mbrojtëse.
Shqetësuese vijojnë të mbeten grumbullimet pa masa mbrojtëse gjatë pjesëmarrjes në ceremonitë martesore apo ato mortore. Denisa Duraku, shefe e Epidemiologjisë pranë Njësisë Vendore të Kujdesit Shëndetësor Kukës, shprehet: “Dasmat apo varrimet nuk duhet të zhvillohen. Një numër i madh i të prekurve kanë dalë nga ceremonitë”.
Që nga rasti i parë i konfirmuar pozitiv në mesin e muajit mars e deri tani, në Kukës janë infektuar mbi 170 qytetarë, ndërsa kanë ndërruar jetë 3 prej tyre. (A2 Televizion)
A2 CNN Livestream
MUND TE LEXONI GJITHASHTU
