Për herë të parë, trupi i mbretit Tutankhamun është nxjerrë jashtë sarkofagut prej floriri, teksa ka nisur zyrtarisht puna për restaurimin e tij, që pritet të zgjasë 8 muaj. Zyrtarët egjiptianë të antikitetit zbulojnë për mediat sarkofagun e famshëm, vendosur tashmë në qendrën e Muzeut të Madh egjiptian.
Sarkofagu shtetëror, pjesë e 3 të tillave, zbuluar në Luginën e Mbretërve në Luksor, është shumë i brishtë dhe për të duhet patur shumë kujdes, tha ministri i Antikitetit Khaled Anany, duke theksuar se për të kurrë nuk është kryer ndonjë ndërhyrje, që kur u zbulua për herë të parë më shumë se 100 vjet më parë.
“Ne kemi bërë vetëm ndërhyrjen e ndihmës, më pas e zhvendosëm varrin në muze. Është mbajtur në izolim për 7 ditë dhe nisëm procesin e tymosjes për 3 javë. Tani kemi 8 muaj në dispozicion për ruajtjen dhe restaurimin e tij”, tha ministri Anany.
Sarkofagu dhe i gjithë thesari historik i koleksionit të varrit të mbretit Tutankhamun pritet të jenë pjesa qendrore e muzeut të madh egjiptian, të cilin zyrtarisht Egjipti do ta inaugurojë vitin e ardhshëm, pranë Piramidave të Gizës.
Arkeologu britanik Howard Carter zbuloi varrin e mbretit në Luginën e Mbretërve në Luksor në vitin 1922. Varri ishte i paprekur dhe në të gjendeshin rreth 5 mijë artefakte, sende të Tutankhamun, që do të zbulohen për herë të parë në muze. Sarkofagu në fjalë u transportua në korrik nga jugu i Egjiptit drejt muzeut. Ndërkohë vetë muzeu, në të cilin punimet vijojnë prej 15 vitesh me financim japonez, pritet të jetë gati në 2020. (A2 Televizion)
A2 CNN Livestream
MUND TE LEXONI GJITHASHTU
