Presidenti Meta ka refuzuar ditën e sotme emërimin e Gent Cakajt si ministër i Jashtëm.
Meta është shprehur se ky vendim është marrë pas një verifikimi të hollësishëm të zotit Gent Cakaj ndërsa është refuzuar propozimi me motivacionin: “I mungon përvoja dhe qëndrimet e tij publike lidhur me çështje thelbësore të politikës rajonale janë të papranueshme. Deklaratat e tij për ndryshimin e kufijve Kosovë-Serbi janë të rrezikshme dhe me pasoja të paparashikueshme”.
Një ditë më parë, Presidenti i Republikës Ilir Meta ka dekretuar edhe katër ministret e mbetura, pikërisht Anila Denaj si Ministre e Financave dhe Ekonomisë, Besa Shahinin si Ministre e Arsimit, Sportit dhe Rinisë dhe Elva Margaritin si Ministre e Kulturës, ndërsa Belinda Balluku dekretohet si Ministre e Infrastrukturës.
Për këtë vendim të Presidentit, i menjëhershëm ishte edhe reagimi i Kryeministrit Rama, i cili e quan atë antikushtetues dhe të turpshëm, ndërsa i kërkon ndjesë edhe Kosovës.
Nuk ka vonuar edhe kundërpërgjigja e Metës, i cili ka reaguar përmes Twitter-it.
“Pavarësia, integriteti territorial i Kosovës dhe vendimi i Gjykatës Ndërkombëtare të Drejtësisë janë të padiskutueshme për Republikën e Shqipërisë deri në sekondën e fundit si President i vendit tim”, shkruan Meta.
Pas kundërpërgjigjes së Ilir Metës, Kryeministri Rama ka vazhduar “luftën” përsëri në rrjetin social Twitter, duke i dalë edhe një herë në mbrojtje kandidatit të tij për ministër të Jashtëm, Gent Cakaj.
“Që Presidenti ynë të shkelë Kushtetutën, godasë qeverinë, nëpërkëmbë një djalë të ri e të paktën 1000 herë më të ditur se ai, duke u marrë paturpësisht me fjalë si të ishte Dëshmitari X...Oh çfarë marre! IM me qyqarët e kadrinjtë mbrojnë Kosovën nga një shqiptar i Kosovës... Pupupu”, shkruan Rama në Twitter. (A2 Televizion)
A2 CNN Livestream
MUND TE LEXONI GJITHASHTU
