Grumbullimi i forcave të ushtrisë serbe në afërsi të kufirit me Kosovën nuk ndihmon në qetësimin e situatës së tensionuar mes dy vendeve. Ky ishte mesazhi që përcolli në Beograd Sekretari i Përgjithshëm i NATO-s, Jens Stoltenberg.
Gjatë një konference të përbashkët për shtyp me Presidentin Aleksandër Vucic, shefi i Aleancës ushtarake perëndimore, i bëri thirrje palëve të përmbahen nga veprimet përshkallëzuese, ndërsa shprehu mbështetjen për propozimin e BE për krijimin e asociacionit të komunave me shumicë serbe.
“Siç i thashë edhe Presidentit Vuçiç gjatë takimit, grumbullimi i ushtrisë serbe pranë kufirit administrativ me Kosovën nuk ndihmon situatën. NATO mirëpret dhe mbështet formimin e Asociacionit të komunave me shumicë serbe në Kosovë. Ky do të ishte çelësi i normalizimit të marrëdhënieve. U bëj thirrje Beogradit dhe Prishtinës që të angazhohen në dialog nën kujdesin e BE-së, kjo është e vetmja rrugë drejt paqes dhe stabilitetit të përhershëm”, tha Stoltenberg.
Vucic nuk hezitoi të replikonte me Stoltenberg lidhur me komentet për ushtrinë duke thënë se ishte punë e Serbisë se ku i pozicionon trupat.
“Ushtria kurrë nuk i ka tejkaluar të drejtat dhe kompetencat e saj. E, ku dhe si do ta vendosim ushtrinë në përputhje me Kushtetutën e Serbisë, pa rrezikuar askënd, kjo është punë e jona.”, tha Vuçiç.
Stoltenberg përsëriti edhe në Beograd, deklaratën e bërë një ditë më herët në Prishtine, se autorët e sulmeve në Banjskë duhet të mbajnë përgjegjësi.
Vuçiç u përgjigj se, kur është fjalë për hetimet ndaj sulmit të 24 shtatorit ka pikëpamje tjetër mbi atë që ka ndodhur po se i kupton kërkesat e NATO-s dhe perëndimit.
Përballë garancisë së Sekretarit të Përgjithshëm se NATO do të sigurojë paqen për të gjithë në Kosovë, Vuçiç theksoi se vetëm serbët janë të rrezikuar atje. (A2 Televizion)
A2 CNN Livestream
MUND TE LEXONI GJITHASHTU
