Kryeministri i Francës deklaroi se një vajzë adoleshente do të ndiqet penalisht pasi akuzoi në mënyrë të padrejtë drejtorin e shkollës se e goditi atë gjatë një debati të ashpër për të hequr mbulesën islamike të kokës.
Drejtori këmbënguli që nxënësja të hiqte mbulesën e kokës brenda shkollës, në përputhje me ligjin francez. Disa ditë më vonë ai dha dorëheqjen pas kërcënimeve me vdekje që qarkulluan në rrjetet sociale.
Drejtori i shkollës në Paris, emri i të cilit nuk është bërë publik, njoftoi vendimin e tij në një email dërguar të premten kolegëve në liceun “Maurice Ravel” në distriktin 20 të Parisit.
"Më në fund kam marrë vendimin për të lënë funksionet e mia," shpjegoi ai, "nga shqetësimi për sigurinë time dhe atë të institucionit."
Prokurorët thanë se dy persona ishin arrestuar në lidhje me kërcënimet me vdekje. Identiteti i tyre nuk është bërë i ditur, por ministria e arsimit tha se ata nuk kishin asnjë lidhje me shkollën.
Policia u dërgua për të patrulluar rreth shkollës, e cila pati një vizitë edhe nga ministrja e Arsimit Nicole Belloubet.
Kërcënimi islamik ndaj shkollave franceze është marrë jashtëzakonisht seriozisht që nga vrasja e dy mësuesve.
Samuel Paty-t iu pre koka në rrugë në një periferi të Parisit në vitin 2020 dhe Dominique Bernard u vra në shkollën e tij në Arras pesë muaj më pas. (A2 Televizion)
A2 CNN Livestream
MUND TE LEXONI GJITHASHTU
