Rusia ndërmori një sulm masiv kundër Ukrainës gjatë natës, dukë lëshuar në total 67 dronë Shahed me rreze të gjatë. Siç thuhet në një njoftim të forcave të mbrojtjes ajrore 58 prej tyre ishin rrëzuar, ndërsa, njësitë mbrojtëse ishin vënë në veprim në 11 rajone rreth Ukrainës. Mbetje të dronëve u zbuluan pranë godinës së parlamentit në kryeqytetin Kiev.
Raketat ose dronët rusë, rrallë depërtojnë kaq thellë në kryeqytetin që mbrohet nga një rrjet sistemesh mbrojtëse, të epokës sovjetike dhe perëndimore. Zona në kodër ku gjendet selia qeveritare në qendër të qytetit, është ndoshta më e mbrojtura në Ukrainë, dhe në të gjenden gjithashtu zyrat e presidentit, kabinetit dhe bankës qëndrore, raporton A2.
Një seri shpërthimesh të forta u dëgjuan në Kiev, pak pas orës 3 të mëngjesit të së shtunës, duke zgjuar banorët e terrorizuar. Teksa Moska ka intensifikuar sulmet kundër Ukrainës, Zelenski përsëriti thirrjen ndaj aleatëve për t’i lejuar të përdorin raketat me rreze të gjatë ndaj territorit rus. Por Sekretari Amerikan i Mbrojtjes, Lloyd Austin tha pas një takimi me ministrat e tjerë mbrojtjes dhe Zelenskin në bazën ajrore gjermane të Ramstein, se përdorimi i raketave me rreze të gjatë nuk do të ndryshonte trajektoren e luftës, transmeton A2.
“E kemi thënë gjithmonë se diçka e tillë nuk do të ishte vendimtare në luftë. E kemi bërë këtë diskutim edhe për tanket, apo për kapacitete të tjera çdo herë, dhe theksojmë se nuk do të mjaftonte vetëm një gjë, por një ndërthurje e aftësive, dhe mënyra se si ato do të integrohen për të arritur objektivët”, citon A2 Lloyd Austin.
Pas ndalesës në Gjermani, Zelenski vizitoi Italinë ku mori garancinë nga kryeministrja Giorgia Meloni se mbështetja e vendit ndaj Kievit, është e palëkundur. (A2 Televizion)
A2 CNN Livestream
MUND TE LEXONI GJITHASHTU
