Një gjykatë në qytetin Besançon, në lindje të Francës, ka dënuar me burgim të përjetshëm ish-anestezistin Frédéric Péchier, i njohur nga prokuroria si “Doktor Vdekja”, pasi u shpall fajtor për helmimin e qëllimshëm të 30 pacientëve, nga të cilët 12 humbën jetën.
Sipas vendimit të gjykatës, Péchier ka kontaminuar qeset e infuzioneve me substanca të rrezikshme, kryesisht kalium, duke shkaktuar arrest kardiak ose hemorragji të rënda, përcjell A2 CNN. Viktimat e tij varionin nga një fëmijë katërvjeçar, i cili i mbijetoi dy arresteve kardiake gjatë një operacioni rutinë për bajamet në vitin 2016, deri te një pacient 89-vjeçar.
Hetimet ndaj Péchier nisën tetë vite më parë, pasi ai u dyshua për helmime në dy klinika të Besançonit gjatë periudhës 2008–2017. Rasti i parë i njohur ishte ai i Sandra Simard, 36 vjeçe, e cila pësoi arrest kardiak gjatë një ndërhyrjeje kirurgjikale në shtyllën kurrizore, por mbijetoi falë ndërhyrjes së menjëhershme mjekësore. Analizat treguan se infuzioni i saj përmbante një dozë kaliumi 100 herë më të lartë se norma.
Gjatë procesit gjyqësor, që zgjati 15 javë, Péchier mohoi akuzat, duke deklaruar se kishte respektuar gjithmonë betimin e Hipokratit. Megjithatë, gjykata e shpalli fajtor dhe vendosi që ai të vuajë minimumi 22 vite burg. Ai ka të drejtë të apelojë vendimin brenda 10 ditëve. (A2 Televizion)
A2 CNN Livestream
MUND TE LEXONI GJITHASHTU
