Kandidatja demokrate për presidencën, Kamala Harris, dhe rivali republikan Donald Trump përcollën mesazhe radikalisht të kundërta gjatë tubimeve elektorale në shtetet kyçe, teksa po përpiqen të fitojnë votuesit e pavendosur, dy javë para zgjedhjeve.
Harris së bashku me ish-ligjvënësen republikane Liz Cheney u përpoqën të bindin gratë konservatore të periferisë në 3 fushëbeteja të rëndësishme: Uiskonsin, Pensilvani dhe Miçigan, se ish-Presidenti Trump përbënte kërcënim për të drejtat e abortit, sigurinë kombëtare dhe demokracinë. Teksa zgjedhjet po afrohen, Harris i ka ashpërsuar sulmet ndaj aftësisë së Trump për të udhëhequr, duke e quajtur shpesh të paqëndrueshëm: “Ai është i papërshtatshëm për të qenë Presidenti i këtij vendi të mirë e të nderuar. Nuk është e vështirë të kuptohet se bëhet gjithmonë e më i paqëndrueshëm. Por, për këtë mos më dëgjoni mua. Dëgjoni ata që e njohin më mirë. Njerëz që kanë punuar me të në Shtëpinë e bardhë apo Zyrën Ovale”.
Nga ana e tij, Trump refuzon çdo nocion se ai është kërcënim për demokracinë, duke pretenduar se kërcënimi real janë demokratët. Teksa Harris pretendon se ai nuk është i përshtatshëm për të udhëhequr, Trump foli për paaftësinë e administratës aktuale gjatë tubimeve të së hënës. Në Karolinën e Veriut u përpoq të fitonte votuesit kristianë, të cilëve u tha se një dorë e mbinatyrshme e kishte shpëtuar nga vdekja gjatë atentatit në korrik: “Teksa kthehem pas në jetën time, e kuptoj se ishte dora e Zotit që më solli aty ku jam sot. Besimi im mori një kuptim të ri në 13 korrik në Butler të Pensilvanisë, kur u përplasa në tokë nga ajo që duket të ishte një dorë e mbinatyrshme. Dua të mendoj se Zoti më shpëtoi për një qëllim, për ta bërë vendin më të mrekullueshëm se kurrë më parë”.
Sipas një sondazhi të fundit të Reuters dhe Ipsos, Kamala Harris prin kundrejt Donald Trump me 46% ndaj 43% të votave, ndërsa një pjesë e mirë e elektoratit mendojnë se vendi është në rrugën e gabuar. (A2 Televizion)
A2 CNN Livestream
MUND TE LEXONI GJITHASHTU
