Nuk ndalen sulmet me dronë ukrainas mbi territorin rus. Gjatë natës mes së enjtes dhe të premtes, objektivi ishte Sevastopoli, në Krimenë e pushtuar nga Rusia. Sipas guvernatorit lokal, Mikhail Razvozhayev, disa persona kanë mbetur të plagosur.
Moska është përgjigjur me një seri sulmesh ndaj Ukrainës. Në rajonin e Dnipropetrovskut, raketat ruse goditën më shumë se dhjetë herë gjatë natës, duke shkaktuar dy viktima. Sulme janë raportuar edhe në rajonin e Kievit. Në Bilohorodka u goditën magazinat e kompanisë Nova Poshta, ndërsa në Sviatopetrivske u dëmtua një impiant prodhimi.
Sipas autoriteteve lokale, Rusia po përdor taktikën e sulmeve të dyfishta. Rreth një orë pas sulmit të parë, ndërsa zjarrfikësit po përpiqeshin të shuanin flakët, dy sulme të tjera goditën të njëjtën zone. Për fat të mirë, ekipet e emergjencës arritën të largohen në kohë.
Në Sumy, një tjetër sulm rus me bomba të drejtuara shkaktoi një viktimë dhe shtatë të plagosur. Ndërkohë, në planin diplomatik, ministri i Jashtëm rus Sergej Lavrov mohon se Moska i ka dhënë Uashingtonit ndonjë ultimatum për përfshirjen amerikane në sulmet ukrainase.
Por sipas Washington Post, në Kremlin besohet se Shtetet e Bashkuara janë dobësuar nga përplasja me Iranin. Vlerësimi konfidencial i Kremlinit është bërë përpara vizitës së fshehtë në Moskë të drejtorit të CIA-s, John Ratcliffe, e cila u zhvillua gjatë kësaj jave.
Kjo, sipas Washington Post, mund t’i japë Kremlinit mundësinë për të intensifikuar veprimet kundër interesave dhe aleatëve amerikanë në Evropë. (A2 Televizion)
A2 CNN Livestream
MUND TE LEXONI GJITHASHTU
