Koreja e Veriut ka një bazë raketash sekrete, të pa raportuar më parë, pranë kufirit të saj verior me Kinën, e cila mund të përbëjë një "kërcënim potencial bërthamor" për pjesën më të madhe të Azisë Lindore dhe Shteteve të Bashkuara. Kështu citon prestigjiozja amerikane CNN bazuar në një raport të publikuar të mërkurën, shkruan A2 CNN.
Baza e raketave ndodhet vetëm 27 kilometra nga kufiri me Kinën. Besohet se aty ruhen deri në nëntë raketa balistike ndërkontinentale (ICBM) me aftësi bërthamore, tha raporti i Qendrës për Studime Strategjike dhe Ndërkombëtare (CSIS) me seli në Uashington.
Vendi është një nga 15 deri në 20 bazat e raketave balistike dhe objektet e magazinimit të kokave bërthamore që Koreja e Veriut nuk i ka deklaruar kurrë, thekson raporti, i cili u mbështet në analizën e imazheve satelitore, intervistat me refugjatët dhe zyrtarët e Koresë së Veriut, dokumentet e deklasifikuara dhe të dhënat me burim të hapur. "Këto raketa përbëjnë një kërcënim potencial bërthamor për Azinë Lindore dhe Shtetet e Bashkuara", paralajmëroi raporti.
Koreja e Veriut ka rritur programin e saj të armëve në vitet e fundit nën udhëheqjen e udhëheqësit Kim Jong Un, duke modernizuar me shpejtësi forcat e saj të armatosura, duke zhvilluar armë të reja dhe duke testuar raketa balistike ndërkontinentale që mund të arrijnë pothuajse kudo në Shtetet e Bashkuara.
Baza ndodhet në një luginë të ngushtë malore, e prerë përgjysmë nga një përrua, dhe ka një sipërfaqe prej 22 kilometrash katrorë, më e madhe se Aeroporti Ndërkombëtar John F. Kennedy i Nju Jorkut.
Ekspertët thonë se vendndodhja e saj pranë kufirit i jep një avantazh gjeografik - vende si Shtetet e Bashkuara mund të jenë të kujdesshme ta synojnë atë, pasi çdo pasojë mund të ndikojë në Kinën fqinje. (A2 Televizion)
A2 CNN Livestream
MUND TE LEXONI GJITHASHTU
