Qeveria e Izraelit ka pranuar propozimin e paraqitur nga SHBA për një armëpushim në Rripin e Gazës. Kështu deklaroi Sekretari Amerikan i Shtetit Anthony Blinken nga Izraeli, ku pati një takim me kryeministrin Benjamin Netanyahu dhe ministrin e Mbrojtjes Yoav Gallad, që zgjati 2.5 orë.
Blinken i bëri thirrje Hamasit të bëjë të njëjtën gjë me propozimin që SHBA-të e kishin paraqitur gjatë bisedimeve në Doha të Katarit, por që lëvizje militante e konsideronte shumë larg pritshmërive të tyre.
Në fjalët e tij, Blinken vuri në dukje se ka ardhur koha për të përfunduar një marrëveshje armëpushimi në Gaza, e cila do të parashikonte kthimin e pengjeve të mbajtura nga Hamasi dhe do të ofronte lehtësim për palestinezët që kanë vuajtur për 10 muaj luftime shkatërruese.
Ky është misioni i nëntë me radhë i Blinken në Lindjen e Mesme që nga fillimi i konfliktit tetorin e kaluar, ndërsa të martën ai pritet të jetë në Kajro për një raund të ri bisedimesh.
Të premten, raundi i parë i kontakteve përfundoi në Doha, megjithëse pak a shumë të gjitha palët sinjalizuan se mbetet ende punë për t’u bërë për të nënshkruar një marrëveshje.
Në një deklaratë të përbashkët nga Egjipti, Katari dhe SHBA thuhet se Uashingtoni i ka paraqitur Izraelit dhe Hamasit një propozim për armëpushim në Gaza, i cili mbyll boshllëqet e mbetura mes tyre. (A2 Televizion)
A2 CNN Livestream
MUND TE LEXONI GJITHASHTU
