Qielli në Lindjen e Mesme gjeti pak qetësi pas fundjavës së trazuar. Izraeli dhe Hezbollahu ndërprenë serinë e qindra sulmeve raketore dhe me armë të ndryshme, në një zhvillim që shtoi frikën për përhapjen e luftës. Ushtria e shtetit hebre njoftoi kryerjen e disa bombardimeve parandaluese në jug të Libanit për të shmangur një sulm masiv që po përgatitej nga militantët e mbështetur nga Irani. Avionët shkatërruan mijëra lëshues raketash, siç raporton A2 CNN.
Megjithatë, Hezbollahu njoftoi lëshimin e 320 raketave dhe dronëve kundër Izraelit, si shenjë hakmarrëse për vrasjen e një komandanti të lartë. Shtetet e Bashkuara të Amerikës bëjnë të ditur se po punojnë për të shmangur ndonjë përhapje të luftës në Lindjen e Mesme. Por, Libani nuk është i vetmi që mësyn Izraelin.
Ushtria e Tel Avivit njofton rrëzimin e një droni kamikaz që ishte nisur nga Siria. Gjithashtu, sirenat e alarmit janë dëgjuar në veriun e Izraelit. Nga ana tjetër, Irani kërcënon me hakmarrje të ashpër për vrasjen e ish-liderit politik të Hamasit, Ismail Haniyeh.
“Do të reagojmë për sulmin izraelit në Teheran”, theksoi ministri i Jashtëm, Abas Aragçi. Ai shton se Irani nuk ka frikë nga shtimi i tensioneve në rajon, por konfirmoi se nuk po e kërkon atë. “Reagimi i Iranit për sulmin terrorist të Izraelit do të jetë i matur dhe i llogaritur mirë”, kërcënoi ministri i Jashtëm gjatë një telefonate me homologun e tij italian.
Antonio Tajani i ka kërkuar Iranit që të ndalojë ciklin e veprimeve ushtarake pasi rrezikojnë të shtojnë dhimbjet në Lindjen e Mesme. Në këtë drejtim po kontribuon Izraeli që përmes një sulmi ajror në qytetin e Gazës ka vrarë 5 palestinezë dhe shumë të tjerë mbetën të plagosur. Luftimet në enklavë vijojnë pasi negociatat për paqen në Egjipt dështuan. Megjithatë, Shtetet e Bashkuara konfirmojnë se përpjekjet për armëpushim dhe kthimin e pengjeve po vijojnë.
A2 Televizion (A2 Televizion)
A2 CNN Livestream
MUND TE LEXONI GJITHASHTU
