Qeveria e Meksikës vendosi të ngrijë marrëdhëniet me ambasadat e Shteteve të Bashkuara dhe Kanadasë, pasi ambasadorët e tyre kritikuan një reformë të propozuar gjyqësore të mbështetur nga presidenti meksikan.
“Ka një pauzë në këto marrëdhënie”, pranoi Presidenti Lopez Obrador gjatë një konference shtypi, duke sqaruar se ngrirja e marrëdhënieve ishte me ambasadat dhe jo me vendet.
Presidenti meksikan mbështet një reformë që kërkon zgjedhjen e gjyqtarëve si dhe anëtarëve të Gjykatës së Lartë përmes një votimi popullor.
Një komision i dhomës së ulët të Kongresit të Meksikës e miratoi propozimin, duke i hapur rrugën miratimit nga Kongresi i sapozgjedhur që merr detyrën në muajin shtator, raporton A2.
Përkrahësit e këtij ligji thonë se reforma do ta forcojë demokracinë dhe do të ndihmojë në rregullimin e një sistemi, për të cilin ata argumentojnë se nuk i shërben publikut. Nga ana tjetër, kritikët thonë se reforma do të anonte gjyqësorin në favor të ekzekutivit, do të ndërpresë karrierën e gjyqtarëve dhe do t'i bëjë gjykatat më të cenueshme.
Javën e kaluar, ambasadori amerikan, Ken Salazar, e cilësoi reformën si një “rrezik të madh për funksionimin e demokracisë në Meksikë” dhe paralajmëroi për një rrezikim të mundshëm të marrëdhënieve tregtare mes Shteteve të Bashkuara dhe Meksikës. (A2 Televizion)
A2 CNN Livestream
MUND TE LEXONI GJITHASHTU
