Zonja e Parë e SHBA-së, Melania Trump, ka mohuar çdo lidhje me Jeffrey Epstein, duke u shprehur para gazetarëve në Shtëpinë e Bardhë se çdo pretendim që i lidh ata “duhet të marrë fund sot”.
Në një njoftim të papritur të enjten, ajo bëri thirrje për mbajtjen e dëgjesave në Kongres për viktimat e trafikimit seksual të lidhur me Epstein.
Melania Trump hodhi poshtë gjithashtu thashethemet online se Epstein e kishte prezantuar me Donald Trump, duke i cilësuar ato si “përpjekje dashakeqe për të dëmtuar reputacionin tim”.
Ajo theksoi se nuk ka qenë kurrë viktimë e Epstein dhe nuk ka pasur dijeni për abuzimet e tij. “Nuk kam pasur kurrë asnjë dijeni për abuzimin e Epstein ndaj viktimave të tij. Nuk kam qenë e përfshirë në asnjë mënyrë. Nuk kam qenë pjesëmarrëse”, deklaroi ajo.
Po ashtu, ajo mohoi se e njihte Ghislaine Maxwell, bashkëpunëtoren e dënuar të Epstein. Duke iu referuar një emaili të vitit 2002 mes saj dhe Maxwell, të publikuar në dosjet Epstein, ajo e cilësoi atë si “korrespondencë të rastësishme” dhe “një përgjigje të sjellshme”.
Nga ana tjetër, Donald Trump u bëri thirrje ligjvënësve që “t’u japin viktimave mundësinë të dëshmojnë nën betim përpara Kongresit”. Ai shtoi: “Çdo grua duhet të ketë ditën e saj për të treguar historinë në publik, nëse dëshiron, dhe dëshmia e saj duhet të regjistrohet përgjithmonë në arkivat e Kongresit. Vetëm atëherë do të kemi të vërtetën.” (A2 Televizion)
A2 CNN Livestream
MUND TE LEXONI GJITHASHTU
