“Po u shemb diga, Kievi do të përmbytet”, Rusia bombardon hidrocentralin në lumin Dnieper

Një breshëri me mbi 100 raketa dhe 100 dronë është lëshuar nga Rusia mbi Kiev këtë të hënë, duke shkaktuar dëme të konsiderueshme në infrastrukturën rrugore dhe atë energjetike.

Nga sulmi është dëmtuar një digë në lumin Dnieper, pasi ushtria ruse ka shënjestruar hidrocentralin në Vyshhorod, në rrjedhën e sipërme të kryeqytetit ukrainas.

Pamjet e pakonfirmuara tregojnë një zjarr në rrugën në krye të digës, ndërsa në videon e dytë shihet një raketë lundrimi duke goditur sipërfaqen e rezervuarit dhe dëmi për momentin është i vështirë të vlerësohet.

Pak pasi raketat ranë mbi digën e hidrocentralit, ish-ministri i Ekonomisë, Tregtisë dhe Bujqësisë së Ukrainës, Timofij Milovanov komentoi situatën për mediat duke thënë se "nëse diga do të shembet, një pjesë e konsiderueshme e Kievit do të përmbytet".

Sulmi mbi hidrocentralin në Vyshhorod erdhi në mes të një sulmi më të madh rus që sipas presidentit ukrainas Volodymyr Zelensky pa ​​më shumë se 200 raketa dhe drone të godisnin territorin e vendit.

“Gjatë natës, Rusia sulmoi përsëri qytete në të gjithë Ukrainën. Me qindra raketa dhe dronë ata sulmuan popullsinë civile të vendit tonë”, tha ministri ukrainas i Mbrojtjes, Rustem Umerov duke shtuar se Kievi po përgatit kundërpërgjigjen.

Gjasat janë që forcat ukrainase të përdorin për herë të parë edhe 'raketën dron' me rreze të gjatë të quajtur Palyanytsia, e cila u prezantuar dy ditë më parë. Arma është projektuar për të shkatërruar potencialin sulmues të Rusisë duke synuar bazat ajrore që përdorën bombarduesit për të sulmuar qytetet e Ukrainës./ A2 CNN (A2 Televizion)