Presidenti Joe Biden mbërriti të enjten në Gjermani pas një shtyrjeje njëjavore të udhëtimit për shkak të uraganit Milton.
Presidenti amerikan dhe kancelari gjerman janë përballur me trysni në rritje lidhur me mbështetjen e tyre për Ukrainën, ndërsa dy udhëheqësit kanë njoftuar së fundmi ndihma të reja sigurie.
Një tjetër temë e rëndësishme diskutimi pritet të jenë njoftimet për rritje të akteve antisemite në të dyja vendet gjatë vitit të fundit. "Kjo është një çështje për të cilën Shtetet e Bashkuara dhe Gjermania kanë bashkëpunuar shumë", tha një zyrtar amerikan, i cili shtoi se megjithëse Presidenti Biden nuk pritet të organizojë një aktivitetet të posaçëm për antisemitizmin gjatë vizitës njëditore, çështja është "shumë e rëndësishme për Presidentin Biden dhe që e ka diskutuar me qeverinë gjermane ndër vite dhe që do të vazhdojë ta diskutojë".
Presidenti Biden synon ta shfrytëzojë vizitën në Gjermani për të diskutuar çështjet e ngutshme, si Ukrainën. Kancelari gjerman ka theksuar rëndësinë e kësaj vizite njëditore duke vlerësuar marrëdhëniet me Shtetet e Bashkuara.
Shtëpia e Bardhë njoftoi të mërkurën se Presidenti Biden miratoi një tjetër paketë ndihme për Ukrainën me një vlerë prej 425 milionë dollarësh.
“Presidenti e vlerëson lart këtë vizitë tek një nga partnerët tanë, një aleat i palëkundur në mbështetjen për Ukrainën. Presidenti dëshironte të shkonte në Gjermani për ta falënderuar drejtpërdrejt Kancelarin Scholz”, tha zëdhënësja e Shtëpisë së Bardhë, Karine Jean-Pierre.
Vizita e Presidentit Biden në Gjermani, e planifikuar fillimisht për javën e kaluar, u shty për shkak të Uraganit Milton. Po ashtu, presidenti do të drejtojë virtualisht një takim për sigurinë në Ukrainë. Shtëpia e Bardhë tha se Presidenti Biden nuk do të takohet personalisht me udhëheqësin ukrainas, siç ishte planifikuar fillimisht.
Kancelari Scholz u takua javën e kaluar me Presidentin Volodymyr Zelenskyy për të dëgjuar planin ukrainas prej pesë pikash, ku përfshihet edhe ftesa për anëtarësim në NATO përpara përfundimit të luftës.
Zelenskyy e paraqiti planin në parlamentin ukrainas të mërkurën.
“Plani shërben si një urë për paqen që do t’i japë fund luftës. Ky plan nuk ka për qëllim të zëvendësojë nismën tonë të paqes, por përkundrazi të forcojë pozitat e Ukrainës në mënyrë që ta sjellim paqen më pranë. Ne mund ta arrijmë këtë përmes bashkëpunimit me të gjithë partnerët tanë. Po llogarisim gjithashtu edhe mbështetjen e Gjermanisë”, tha presidenti ukrainas.
Shefi i ri i NATO-s tha të mërkurën se Ukraina do të jetë “një ditë” anëtare e aleancës. VOA
(A2 Televizion)
A2 CNN Livestream
MUND TE LEXONI GJITHASHTU
